kyaa kahein aur dil ke baare mein — Kashif Husain Ghair

na ham vahshat mein apne ghar se nikle
na sahraa apni viraani se niklaa

— Kashif Husain Ghair

bane hain kaam sab uljhan se mere
yahi atvaar hain bachpan se mere

— Kashif Husain Ghair

zindagi mein kasak zaruri thi
ye khalaa pur tiri kami se huaa

— Kashif Husain Ghair

haal puchhaa na kare haath milaayaa na kare
main isi dhuup mein khush huun koi saaya na kare

— Kashif Husain Ghair

kyaa chaahti hai ham se hamaari ye zindagi
kyaa qarz hai jo ham se adaa ho nahin rahaa

— Kashif Husain Ghair

mere andar kaa shor hai mujh mein
varna baahar to khaamushi hai yahaan

— Kashif Husain Ghair

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

us ke munh pe mukar gayaa thaa dil
aaj had se guzar gayaa thaa dil

— Divyansh Rawat

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki