shaayad ik bhuli tamannaa miTte miTte ji uThe — Majeed Amjad

tire khayaal ke pahlu se uTh ke jab dekhaa
mahak rahaa thaa zamaane mein chaar-su tiraa gham

— Majeed Amjad

nigah uThi to zamaane ke saamne tiraa ruup
palak jhuki to mire dil ke ru-ba-ru tiraa gham

— Majeed Amjad

main roz idhar se guzartaa huun kaun dekhtaa hai
main jab idhar se na guzrungaa kaun dekhegaa

— Majeed Amjad

masih-o-khizr ki umrein nisaar hon us par
vo ek lamha jo yaaron ke darmiyaan guzre

— Majeed Amjad

salaam un pe tah-e-tegh bhi jinhon ne kahaa
jo teraa hukm jo teri razaa jo tu chaahe

— Majeed Amjad

har vaqt fikr-e-marg-e-gharibaana chaahiye
sehhat kaa ek pahlu marizaana chaahiye

— Majeed Amjad

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

us shaan-e-aajizi ke fidaa jis ne 'aarzu'
har naaz har ghurur ke qaabil banaa diyaa

— Arzoo Lakhnavi

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

— Wafa Naqvi

chal su-e-gor-e-garibaan ai haris-e-maal-o-zar
dekh kitni aarzuein nazr-e-madfan ho gaiin

— Auj Lakhnavi

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

— Hasan Abidi