chalegaa tiir jab apni duaa kaa — Mirza Maseeta Beg Muntahi

khud rahm kijiye dil-e-ummid-vaar par
aaphi nikaaliye koi surat nibaah ki

— Mirza Maseeta Beg Muntahi

tere baazaar-e-dahr mein gardun
ham bhi aae hain ik qabaa ke liye

— Mirza Maseeta Beg Muntahi

jalaa kar zaahidon ko mai-kashon ko shaad karte hain
giraa kar masjidon ko mai-kade aabaad karte hain

— Mirza Maseeta Beg Muntahi

piiri hui shabaab se utraa jhaTak gayaa
shaaer huun meraa misra-e-saani laTak gayaa

— Mirza Maseeta Beg Muntahi

baad marne ke Thikaane lag gai miTTi miri
khaak se aashiq ki kyaa kyaa yaar ke saaghar bane

— Mirza Maseeta Beg Muntahi

tohmat-e-jurm-o-khataa hirs-o-havaa ghaflat-e-dil
ham ne baazaar se hasti ke liyaa kyaa kyaa kuchh

— Mirza Maseeta Beg Muntahi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

— Asim Wasti

abr barse to inaayat us ki
shaakh to sirf duaa karti hai

— Parveen Shakir

sikhaa na duaaon mein qanaaat kaa saliqa
vo maang rahaa huun jo muqaddar mein nahin hai

— Asim Wasti

main ne din raat khudaa se ye duaa maangi thi
koi aahaT na ho dar par mire jab tu aae

— Bashir Badr

bole vo muskuraa ke bahut iltijaa ke baad
ji to ye chaahtaa hai tiri maan jaaiye

— Bekhud Dehlvi