nahin hai paas kisi kaa kisi ko ai 'mohsin' — Mohammad Daood Mohsin

kaun apnaa hai yahaan kaun paraayaa kahiye
kaun detaa hai bhalaa dukh mein sahaaraa kahiye

— Mohammad Daood Mohsin

main chaahtaa huun tumhein apni zindagi ki tarah
mire vajud pe chhaa jaao chaandni ki tarah

— Mohammad Daood Mohsin

har ek shaam sanvar jaaegi miri 'mohsin'
har ek baat tumhaari hai shaairi ki tarah

— Mohammad Daood Mohsin

afsaana dard-o-gham kaa sunaayaa na jaaegaa
ab zakhm-e-dil kisi ko dikhaayaa na jaaegaa

— Mohammad Daood Mohsin

itne fareb khaae hain qurbat mein yaar ki
'mohsin' fareb aur bhi khaayaa na jaaegaa

— Mohammad Daood Mohsin

zindagi TuuT ke bikhri hai sar-e-raah abhi
haadisa kahiye ise yaa ki tamaashaa kahiye

— Mohammad Daood Mohsin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb