naam hi le le tumhaaraa koi — Nomaan Shauque

rok do ye raushni ki tez dhaar
meri miTTi mein gundhi hai raat bhi

vo saanp jis ne mujhe aaj tak Dasaa bhi nahin
tamaam zahr sukhan mein mire usi kaa hai

phir is mazaaq ko jamhuriyat kaa naam diyaa
hamein Daraane lage vo hamaari taaqat se

apni aahaT pe chaunktaa huun main
kis ki duniyaa mein aa gayaa huun main

vo tanz ko bhi husn-e-talab jaan khush hue
ulTaa paDhaa gayaa, miraa paighaam aur thaa

is baar intizaam to sardi kaa ho gayaa
kyaa haal peD kaTte hi basti kaa ho gayaa