ibtidaa mujh mein intihaa mujh mein — Saeed Naqvi

ye khud-navisht to mujh ko adhuri lagti hai
jo ho sake to nayaa intisaab maangun main

main duur duur se khud ko uThaa ke laataa rahaa
ki TuuT jaaun to phir duur tak bikhartaa huun

kuchh log the safar mein magar ham-zabaan na the
hai lutf guftugu kaa jo apni zabaan mein ho

main apne saare savaalon ke jaantaa huun javaab
miraa savaal mire zehn ki sharaarat hai

tu meri tishna-labi par savaal kartaa hai
samundaron pe banaayaa thaa apnaa ghar main ne

jab aaine dar-o-divaar par nikal aaein
to shahr-e-zaat mein rahnaa bhi ik qayaamat hai