ghar ke baare mein yahi jaan sakaa huun ab tak — Sagheer Malal

un se bachnaa ki bichhaate hain panaahein pahle
phir yahi log kahin kaa nahin rahne dete

— Sagheer Malal

bas is khayaal se dekhaa tamaam logon ko
jo aaj aise hain kaise vo kal rahe honge

— Sagheer Malal

taajjub un ko hai kyuun meri khud-kalaami par
har aadmi kaa koi raaz-daan zaruri hai

— Sagheer Malal

ek lamhe mein zamaana huaa takhliq 'malaal'
vahi lamha hai yahaan aur zamaana hai vahi

— Sagheer Malal

samajhtaa huun main agar sab alaamatein us ki
to phir vo meri tarah se hi sochtaa hogaa

— Sagheer Malal

ek rahne se yahaan vo maavaraa kaise huaa
sab se pahlaa aadmi khud se judaa kaise huaa

— Sagheer Malal

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

— Fani Badayuni

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

— Mir Taqi Mir

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

— Arshad Jamal Sarim

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi