mere baare mein jo sunaa tu ne — Sagheer Malal

sab savaalon ke javaab ek se ho sakte hain
ho to sakte hain magar aisaa kahaan hotaa hai

tamaam vahm o gumaan hai to ham bhi dhoka hain
isi khayaal se duniyaa ko main ne pyaar kiyaa

hai ek umr se khvaahish ki duur jaa ke kahin
main khud ko ajnabi logon ke darmiyaan dekhun

zamaane bhar se ulajhte hain jis ki jaanib se
akele-pan mein use ham bhi kyaa nahin kahte

zarurat us ki hamein hai magar ye dhyaan rahe
kahaan vo ghair-zaruri kahaan zaruri hai

tere baare mein agar khaamosh huun main aaj tak
phir tire haq mein kisi kaa faisla kaise huaa