vo chehra mujhe saaf dikhaai nahin detaa — Sarfaraz Khalid

usi ke khvaab the saare usi ko saunp diye
so vo bhi jiit gayaa aur main bhi haaraa nahin

raunaq-e-bazm nahin thaa koi tujh se pahle
raunaq-e-bazm tire baa'd nahin hai koi

aaine mein kahin gum ho gai surat meri
mujh se milti hi nahin shakl-o-shabaahat meri

us se kah do ki mujhe us se nahin milnaa hai
vo hai masruf to be-kaar nahin huun main bhi

dil jo TuuTaa hai to phir yaad nahin hai koi
is kharaabe mein ab aabaad nahin hai koi

milte ho to ab tum bhi bahut rahte ho khaamosh
kyaa tum ko bhi ab meri khabar hone lagi hai