Yaad

kitne nādāñ haiñ tire bhūlne vaale ki tujhe
yaad karne ke liye umr paḌī ho jaise

sunā hai vo mire baare meñ sochtā hai bahut
ḳhabar to hai hī magar mo'tabar zyāda nahīñ

sayyād terā ghar mujhe jannat sahī magar
jannat se bhī sivā mujhe rāhat chaman meñ thī

thā irāda tirī fariyād kareñ hākim se
vo bhī ai shoḳh tirā chāhne vaalā niklā

ham ahl-e-qafas tanhā bhī nahīñ har roz nasīm-e-sub.h-e-vatan
yādoñ se mo.attar aatī hai ashkoñ se munavvar jaatī hai

na itnā zulm kar ai chāñdnī bahr-e-ḳhudā chhup jā
tujhe dekhe se yaad aatā hai mujh ko māhtāb apnā

zamāna saḳht kam-āzār hai ba-jān-e-asad
vagarna ham to tavaqqo zyāda rakhte haiñ

raat yuuñ dil meñ tirī khoī huī yaad aa.ī
jaise vīrāne meñ chupke se bahār aa jaa.e

duniyā ne terī yaad se begāna kar diyā
tujh se bhī dil-fareb haiñ ġham rozgār ke

kabhī jo aah ke misre kuuñ yaad kartā huuñ
ḳhayāl-e-qad kuuñ tire mustazād kartā huuñ

is zindagī meñ itnī farāġhat kise nasīb
itnā na yaad aa ki tujhe bhuul jaa.eñ ham

''aap kī yaad aatī rahī raat bhar''
chāñdnī dil dukhātī rahī raat bhar

jaane kis aalam meñ tū bichhḌā ki hai tere baġhair
aaj tak har naqsh fariyādī mirī tahrīr kā

maiñ ne majnūñ pe laḌakpan meñ 'asad'
sang uThāyā thā ki sar yaad aayā

ġhalatī-hā-e-mazāmīñ mat pūchh
log naale ko rasā bāñdhte haiñ

aql ko tanqīd se fursat nahīñ
ishq par a.amāl kī buniyād rakh

gar kiyā nāseh ne ham ko qaid achchhā yuuñ sahī
ye junūn-e-ishq ke andāz chhuT jāveñge kyā

maiñ ziyāda huuñ bahut us ke liye ab tak bhī
aur mere liye vo saare kā saarā kam hai

rahtā nahīñ huuñ bojh kisī par ziyāda der
kuchh qarz thā agar to adā bhī huā huuñ maiñ

jab tujhe yaad kar liyā sub.h mahak mahak uThī
jab tirā ġham jagā liyā raat machal machal ga.ī