kahin bhi khud ko kabhi be-nishaan na hone diyaa — Shahbaz Raja

haasil-e-kun bhi nigaahon kaa ishaara to nahin
ye jo dil mujh mein dhaDaktaa hai tumhaaraa to nahin

— Shahbaz Raja

aasmaan-dar-aasmaan asraar mujh par khul gae
main uDaayaa jaa rahaa huun shahpar-e-jibril se

— Shahbaz Raja

gavaaraa kaise karein us ki tamkanat 'shahbaaz'
ki kuchh to ham bhi havaa apne sar mein rakhte hain

— Shahbaz Raja

vo sar-e-mahfil baDhaate jaa rahe hain guftugu
main magar katraa rahaa huun baat ki tafsil se

— Shahbaz Raja

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

safar mein aise kai marhale bhi aate hain
har ek moD pe kuchh log chhuT jaate hain

— Aabid Adeeb

yuun to maujud apne ghar mein hai
aadmi mustaqil safar mein hai

— Saleem Amrohvi

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

— Anjum Siddiqui

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey