dhuup ghaDe se le gai saare paani ko — Shaukat Fahmi

dhyaan mein koi chehra laa kar marzi kaa
aankhein bun leti hain manzar marzi kaa

zaraa shaadaab honaa chaahte hain
hamein rone do ronaa chaahte hain

ik umr tak main us ki zarurat banaa rahaa
phir yuun huaa ki us ki zarurat badal gai

badlaa jo vaqt gahri rifaaqat badal gai
suraj Dhalaa to saae ki surat badal gai

hamaare paas sunaane ko kuchh nahin 'fahmi'
hamein to khvaab bhi dekhe hue zamaana huaa

vo ek shakhs kisi taur jo miraa na huaa
miri balaa se kisi kaa huaa huaa na huaa