kam samajhte nahin ham khuld se maikhaane ko — Syed Yusuf Ali Khan Nazim

roza rakhtaa huun subuhi pi ke hangaam-e-sahar
shaam ko masjid mein hotaa huun jamaaat kaa sharik

— Syed Yusuf Ali Khan Nazim

vaaiz o shaikh sabhi khuub hain kyaa batlaaun
main ne maikhaane se kis kis ko nikalte dekhaa

— Syed Yusuf Ali Khan Nazim

iid hai ham ne bhi jaanaa ki na hoti gar iid
mai-farosh aaj dar-e-mai-kada kyuun vaa kartaa

— Syed Yusuf Ali Khan Nazim

shabistaan mein raho baaghon mein khelo mujh se kyuun puchho
ki raatein kis tarah kaTti hain din kaise guzarte hain

— Syed Yusuf Ali Khan Nazim

kahte hain chhup ke raat ko piitaa hai roz mai
vaaiz se raah kijiye paidaa kisi tarah

— Syed Yusuf Ali Khan Nazim

jab tiraa naam sunaa to nazar aayaa goyaa
kis se kahiye ki tujhe kaan se ham dekhte hain

— Syed Yusuf Ali Khan Nazim

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid