lamha-e-imkaan ko pahlu badalte dekhnaa — Tanveer Anjum

is khubi-e-qismat pe mujhe naaz bahut hai
vo shakhs miri jaan kaa talabgaar huaa hai

— Tanveer Anjum

shahron ke saare jangal gunjaan ho gae hain
phir log mere andar sunsaan ho gae hain

— Tanveer Anjum

duur tak ye raaste khaamosh hain
duur tak ham khud ko sunte jaaeinge

— Tanveer Anjum

dukhon ke ruup bahut aur sukhon ke khvaab bahut
tiraa karam hai bahut par mire azaab bahut

— Tanveer Anjum

TuuTi hai ye kashti to mire saath safar ko
vo jaan-e-masaafat miraa tayyaar huaa hai

— Tanveer Anjum

fareb-e-qurb-e-yaar ho ki hasrat-e-supurdagi
kisi sabab se dil mujhe ye be-qaraar chaahiye

— Tanveer Anjum

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

chaand ne taan li hai chaadar-e-abr
ab vo kapDe badal rahi hogi

— Jaun Elia