badan mein ruuh ki tarsil karne vaale log — Tauqeer Taqi

kal jahaan divaar hi divaar thi
ab vahaan dar hai jabin hai ishq hai

— Tauqeer Taqi

yahin aanaa hai bhaTakti hui aavaazon ko
yaani kuchh baat to hai koh-e-nidaa mein aisi

— Tauqeer Taqi

ab zamaane mein mohabbat hai tamaashe ki tarah
is tamaashe se bahaltaa nahin tu bhi main bhi

— Tauqeer Taqi

daaman bachaa rahe the ki chehra bhi jal gayaa
kis aag se guzar ke tiri raushni mein aae

— Tauqeer Taqi

hijr thaa baar-e-amaanat ki tarah
so ye gham aakhiri hichki se uThaa

— Tauqeer Taqi

lafz ki qaid se rihaa ho jaa
aa miri aankh se adaa ho jaa

— Tauqeer Taqi

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

chaand ne taan li hai chaadar-e-abr
ab vo kapDe badal rahi hogi

— Jaun Elia

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki