ek chehra tiraa dekhne ke liye — Zeeshan Niyazi

mujh se naaraaz bhi nahin hai vo
aur us ko manaa rahaa huun main

muddaton khud se mulaaqaat nahin hoti hai
raat hoti hai magar raat nahin hoti hai

sau baar TuTne pe bhi haaraa nahin huun main
miTTi kaa ik charaagh huun taaraa nahin huun main

us ne itnaa kiyaa nazar-andaaz
sab ki nazron mein aa gae hain ham

fazaaein raqs mein hain aur baras rahi hai sharaab
kisi ne jaam su-e-asmaan uchhaalaa hai

main din ke ujaale mein tujhe soch rahaa huun
mahsus ye hotaa hai ki kuchh raushni kam hai