Sharab

ab to ye aarzū hai ki vo zaḳhm khā.iye
tā-zindagī ye dil na koī aarzū kare

'iqbāl' lakhna.ū se na dillī se hai ġharaz
ham to asiir haiñ ḳham-e-zulf-e-kamāl ke

vo āshiqī ke khet meñ sābit qadam huā
jo koī zaḳhm-e-ishq liyā dil kī Dhaal par

takiya-e-maḳhmalī sirhāne rakh
lekin āñkhoñ siiñ apnī ḳhvāb nikāl

qismat meñ gar hamārī ye mai hai to sāqiyā
be-iḳhtiyār aap se shīsha karegā jast

sar pā-e-ḳhum pe chāhiye hañgām-e-be-ḳhudī
rū sū-e-qibla vaqt-e-munājāt chāhiye

ġham-e-duniyā bhī ġham-e-yār meñ shāmil kar lo
nashsha baḌhtā hai sharābeñ jo sharāboñ meñ mileñ

kyuuñ na TuuTe mirī tauba jo kahe tū saaqī
pī le pī le are ghanghor ghaTā chhā.ī hai

aage kuchh baḌh kar milegī masjid-e-jāme 'riyāz'
ik zarā muḌ jā.iyegā mai-kade ke dar se aap

tirā chaḌhā huā dariyā samajh meñ aatā hai
tire ḳhamosh kināre nahīñ samajhtā huuñ

'ġhālib' chhuTī sharāb par ab bhī kabhī kabhī
piitā huuñ roz-e-abr o shab-e-māhtāb meñ

ḳhudā ke haath hai biknā na biknā mai kā ai saaqī
barābar masjid-e-jāme ke ham ne ab dukāñ rakh dī

mai-ḳhāna salāmat hai to ham surḳhī-e-mai se
taz.īn-e-dar-o-bām-e-haram karte raheñge

ye mai-kada hai ki masjid ye aab hai ki sharāb
koī bhī zarf barā.e vuzū nahīñ baaqī

teshe baġhair mar na sakā kohkan 'asad'
sargashta-e-ḳhumār-e-rusūm-o-quyūd thā

ham ne dekhā taraf-e-mai-kada jaate the 'riyāz'
ik asā thāme abā pahne amāma bāñdhe

qadr mujh rind kī tujh ko nahīñ ai pīr-e-muġhāñ
tauba kar luuñ to kabhī mai-kada ābād na ho

mujh tak kab un kī bazm meñ aatā thā daur-e-jām
saaqī ne kuchh milā na diyā ho sharāb meñ

saaqī ye ḳhamoshī bhī to kuchh ġhaur-talab hai
saaqī tire mai-ḳhvār baḌī der se chup haiñ

vaa.iz na tum piyo na kisī ko pilā sako
kyā baat hai tumhārī sharāb-e-tuhūr kī