ashk ankhon men liye aThon pahar dekhega kaun — Afzal Allahabadi

ab to har ek adakar se Dar lagta hai
mujh ko dushman se nahin yaar se Dar lagta hai

— Afzal Allahabadi

tu jugnu hai faqat raton ke daman men basera kar
main suraj huun tu mujh se ashna.i kar nahin sakta

— Afzal Allahabadi

ghamon ki dhuup men milte hain sa.eban ban kar
zamin pe rahte hain kuchh log asman ban kar

— Afzal Allahabadi

har naghma-e-pur-dard har ik saaz se pahle
hangama bapa hota hai aghaz se pahle

— Afzal Allahabadi

abhi to us ka koi tazkira hua bhi nahin
abhi se bazm men khushbu ka raqs jaari hai

— Afzal Allahabadi

main chahta tha ki us ko gulab pesh karun
vo khud gulab tha us ko gulab kya deta

— Afzal Allahabadi