hansi un ke labon tak aa ga.i hai — Aslam Rashid

sab ko kanTon pe shak hua tha magar
zakhm ke as-pas phuul mile

— Aslam Rashid

aansu bata rahe hain ki mujh men hai zindagi
ya'ni main intizar men patthar nahin hua

— Aslam Rashid

javab hans ke diya us ne aur rone laga
saval puchh ke sharmindagi baDhi meri

— Aslam Rashid

'mir' 'ghalib' yahin to rahte the
ham bhi dilli se dil laga len kya

— Aslam Rashid

hota nahin udaas kisi dukh se main kabhi
itne hasin log mire as-pas hain

— Aslam Rashid

dard chehra pahan ke aaya tha
tera chehra tha so qubul kiya

— Aslam Rashid