mujhe rutba-e-gham batana paDega — Fana Nizami Kanpuri

tire va.adon pe kahan tak mira dil fareb khaa.e
koi aisa kar bahana miri aas TuuT jaa.e

— Fana Nizami Kanpuri

ik tujh ko dekhne ke liye bazm men mujhe
auron ki samt maslahatan dekhna paDa

— Fana Nizami Kanpuri

duniya-e-tasavvur ham abad nahin karte
yaad aate ho tum khud hi ham yaad nahin karte

— Fana Nizami Kanpuri

koi paband-e-mohabbat hi bata sakta hai
ek divane ka zanjir se rishta kya hai

— Fana Nizami Kanpuri

kuchh dard ki shiddat hai kuchh pas-e-mohabbat hai
ham aah to karte hain fariyad nahin karte

— Fana Nizami Kanpuri

tu kuchh to mire zabt-e-mohabbat ka sila de
hangam-e-'fana' dida-e-pur-nam ki tarah aa

— Fana Nizami Kanpuri