bhiiD tanha.iyon ka mela hai — Saba Akbarabadi

kaam aa.egi mizaj-e-ishq ki ashuftagi
aur kuchh ho ya na ho hangama-e-mahfil sahi

— Saba Akbarabadi

gham-e-dauran ko baDi chiiz samajh rakkha tha
kaam jab tak na paDa tha gham-e-janan se hamen

— Saba Akbarabadi

jab ishq tha to dil ka ujala tha dahr men
koi charagh nur-badaman nahin hai ab

— Saba Akbarabadi

apne jalne men kisi ko nahin karte hain sharik
raat ho jaa.e to ham sham.a bujha dete hain

— Saba Akbarabadi

samjhega aadmi ko vahan kaun aadmi
banda jahan khuda ko khuda manta nahin

— Saba Akbarabadi

doston se ye kahun kya ki miri qadr karo
abhi arzan huun kabhi paoge nayab mujhe

— Saba Akbarabadi