dhuāñ sā phail gayā dil meñ shaam Dhalte hī — Shayari Of Abbas Rizvi

"ham tire husn-e-jahāñ-tāb se Dar jaate haiñ aise muflis haiñ ki asbāb se Dar jaate haiñ ḳhauf aisā hai ki duniyā ke satā.e hue log kabhī mimbar kabhī mehrāb se Dar jaate haiñ raat ke pichhle pahar niiñd meñ chalte hue log ḳhuun hote hue mahtāb se Dar jaate haiñ shaad rahte haiñ isī jāma-e-uryānī meñ haañ magar atlas-o-kamḳhvāb se Dar jaate haiñ kabhī karte haiñ mubāraz-e-talabī duniyā se aur kabhī ḳhvāhish-e-betāb se Dar jaate haiñ jī to kahtā hai ki chaliye usī kūche kī taraf ham tirī bazm ke ādāb se Dar jaate haiñ ham to vo haiñ ki jinheñ raas nahīñ koī nagar kabhī sāhil kabhī girdāb se Dar jaate haiñ"

"jab koī tiir havādis kī kamāñ se aayā naġhma ik aur mire mutrib-e-jāñ se aayā ek nazzāre ne mere liye āñkheñ bhejīñ dil kisī kārgah-e-shīsha-girāñ se aayā jab bhī is dil ne tire qurb kī daulat chāhī ek saaya sā nikal kar rag-e-jāñ se aayā maiñ na Dartā thā anāsir kī sitam-koshī se ḳhauf aayā to bas ik umr-e-ravāñ se aayā kyā karūñ ḳhil.at o dastār kī ḳhvāhish ki mujhe ziist karne kā salīqa bhī ziyāñ se aayā maiñ to ik ḳhvāb ko āñkhoñ meñ liye phirtā thā ye sitāra mire pahlū meñ kahāñ se aayā"

"maiñ us se duur rahā us kī dastaras meñ rahā vo ek sho.ale kī sūrat mire nafas meñ rahā nazar asiir isī chashm-e-mai-fashāñ kī rahī mirā badan bhī mirī ruuh ke qafas meñ rahā chaman se TuuT gayā barg-e-zard kā rishta na aab o gil meñ samāyā na ḳhār-o-ḳhas meñ rahā tamām umr kī be-tābiyoñ kā hāsil thā vo ek lamha jo sadiyoñ ke pesh-o-pas meñ rahā vo ek shā.er-e-āshufta-sar ki mujh meñ thā havā kā saath na de kar havā ke bas meñ rahā kisī ḳhayāl ke nashshe meñ din guzarte rahe maiñ apnī umr ke unnīsveñ baras meñ rahā"

"ta.abīr ko tarse hue ḳhvāboñ kī zabāñ haiñ tasvīr ke hoñToñ pe jo bosoñ ke nishāñ haiñ āñkhoñ meñ tar-o-tāza haiñ jis ahd ke manzar ham log usī ahd-e-guzishta meñ javāñ haiñ nīlām hamārā bhī isī shart pe hogā ham raunaq-e-bāzār haiñ jaise haiñ jahāñ haiñ dil thā ki kisī sā.at-e-pur-ḳhūñ meñ huā sard āñkheñ haiñ ki ab tak tirī jānib nigarāñ haiñ dīvār pe likkhā hai ki ab sub.h na hogī aur sāya-e-dīvār meñ ham raqs-kunāñ haiñ"

"har taraf shor-e-fuġhāñ hai koī suntā hī nahīñ qāfila hai ki ravāñ hai koī suntā hī nahīñ ik sadā pūchhtī rahtī hai koī zinda hai maiñ kahe jaatā huuñ haañ hai koī suntā hī nahīñ maiñ jo chup thā hama-tan-gosh thī bastī saarī ab mire muñh meñ zabāñ hai koī suntā hī nahīñ dekhne vaale to is shahr meñ yuuñ bhī kam the ab samā.at bhī girāñ hai koī suntā hī nahīñ ek hañgāma ki is dil meñ bapā rahtā thā ab karāñ-tā-ba-karāñ hai koī suntā hī nahīñ kyā sitam hai ki mire shahr meñ merī āvāz jaise āvāz-e-sagāñ hai koī suntā hī nahīñ"

"jis ko ham samajhte the umr bhar kā rishta hai ab vo rābta jaise rahguzar kā rishta hai sub.h tak ye maujeñ bhī thak ke so hī jā.eñgī chāñd kā samundar hai raat bhar kā rishta hai ye jo itne saare dil saath hī dhaḌakte haiñ kuchh qalam kā naata hai kuchh hunar kā rishta hai tez haiñ to kyā ġham hai tund haiñ to shikva kyā in havāoñ se apnā bāl-o-par kā rishta hai is hasīñ tasavvur kā merī surḳh āñkhoñ se aab o gil kā naata hai bām-o-dar kā rishta hai ek nā-tavāñ rishta us se ab bhī baaqī hai jis tarah duāoñ kā aur asar kā rishta hai"