main us se duur rahaa us ki dastaras mein rahaa — Abbas Rizvi

"guzar gayaa vo zamaana vo zakhm bhar bhi gae safar tamaam huaa aur ham-safar bhi gae usi nazar ke liye be-qaraar rahte the usi nigaah ki be-taabiyon se Dar bhi gae hamaari raah mein saaya kahin nahin thaa magar kisi shajar ne pukaaraa to ham Thahar bhi gae ye sail-e-ashk hai barbaad kar ke chhoDegaa ye ghar na paaoge dariyaa agar utar bhi gae sahar hui to ye uqda bhi taaeron pe khulaa ki aashiyaan hi nahin ab ke baal-o-par bhi gae bahut aziiz thi ye zindagi magar ham log kabhi kabhi to kisi aarzu mein mar bhi gae shajar ke saath koi barg-e-zard bhi na rahaa havaa chali to bahaaron ke nauhagar bhi gae"

"dhuaan saa phail gayaa dil mein shaam Dhalte hi badal gae mire mausam tire badalte hi simaTte phailte saae kalaam karne lage lahu mein khauf kaa pahlaa charaagh jalte hi koi malul si khushbu fazaa mein tair gai kisi khayaal ke harf-o-sadaa mein Dhalte hi vo dost thaa ki adu main ne sirf ye jaanaa ki vo zamin pe aayaa mire sambhalte hi badan ki aag ne lafzon ko phir se zinda kiyaa huruf sabz hue barf ke pighalte hi vo habs thaa ki tarasti thi saans lene ko so ruuh taaza hui jism se nikalte hi"

"jis ko ham samajhte the umr bhar kaa rishta hai ab vo raabta jaise rahguzar kaa rishta hai subh tak ye maujein bhi thak ke so hi jaaeingi chaand kaa samundar hai raat bhar kaa rishta hai ye jo itne saare dil saath hi dhaDakte hain kuchh qalam kaa naata hai kuchh hunar kaa rishta hai tez hain to kyaa gham hai tund hain to shikva kyaa in havaaon se apnaa baal-o-par kaa rishta hai is hasin tasavvur kaa meri surkh aankhon se aab o gil kaa naata hai baam-o-dar kaa rishta hai ek naa-tavaan rishta us se ab bhi baaqi hai jis tarah duaaon kaa aur asar kaa rishta hai"

"ham tire husn-e-jahaan-taab se Dar jaate hain aise muflis hain ki asbaab se Dar jaate hain khauf aisaa hai ki duniyaa ke sataae hue log kabhi mimbar kabhi mehraab se Dar jaate hain raat ke pichhle pahar niind mein chalte hue log khuun hote hue mahtaab se Dar jaate hain shaad rahte hain isi jaama-e-uryaani mein haan magar atlas-o-kamkhvaab se Dar jaate hain kabhi karte hain mubaaraz-e-talabi duniyaa se aur kabhi khvaahish-e-betaab se Dar jaate hain ji to kahtaa hai ki chaliye usi kuche ki taraf ham tiri bazm ke aadaab se Dar jaate hain ham to vo hain ki jinhein raas nahin koi nagar kabhi saahil kabhi girdaab se Dar jaate hain"

"taabir ko tarse hue khvaabon ki zabaan hain tasvir ke honTon pe jo boson ke nishaan hain aankhon mein tar-o-taaza hain jis ahd ke manzar ham log usi ahd-e-guzishta mein javaan hain nilaam hamaaraa bhi isi shart pe hogaa ham raunaq-e-baazaar hain jaise hain jahaan hain dil thaa ki kisi saaat-e-pur-khun mein huaa sard aankhein hain ki ab tak tiri jaanib nigaraan hain divaar pe likkhaa hai ki ab subh na hogi aur saaya-e-divaar mein ham raqs-kunaan hain"

"har taraf shor-e-fughaan hai koi suntaa hi nahin qaafila hai ki ravaan hai koi suntaa hi nahin ik sadaa puchhti rahti hai koi zinda hai main kahe jaataa huun haan hai koi suntaa hi nahin main jo chup thaa hama-tan-gosh thi basti saari ab mire munh mein zabaan hai koi suntaa hi nahin dekhne vaale to is shahr mein yuun bhi kam the ab samaaat bhi giraan hai koi suntaa hi nahin ek hangaama ki is dil mein bapaa rahtaa thaa ab karaan-taa-ba-karaan hai koi suntaa hi nahin kyaa sitam hai ki mire shahr mein meri aavaaz jaise aavaaz-e-sagaan hai koi suntaa hi nahin"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"khel duniyaa-e-'aarzi kaa huun ek kirdaar zindagi kaa huun mujh ko rakkhaa gayaa andhere mein main bhi haqdaar raushni kaa huun intihaa ke qarib hai duniyaa aadmi aakhiri sadi kaa huun dil ko ehsaas ho gayaa teraa mo'tarif teri dosti kaa huun main ne ghurbat mein 'ilm sikhaa hai main to maqruz muflisi kaa huun pur na hogaa jo mere baa'd kabhi ek aisaa khalaa kami kaa huun meraa dushman nahin 'khayaali' koi dost bhi main kisi kisi kaa huun"

"nahin piitaa main par navaazish hui hai baDi mausamon ki sifaarish hui hai bahut din se sahraa ke jaisaa ye dil hai na baadal ghire hain na baarish hui hai yahaan hai bulandi jo kirdaar ki to vahaan khaal-o-khad ki numaaish hui hai tiri jhiil jaisi jo dekhi hain aankhein miri Duub jaane ki khvaahish hui hai chhalaktaa nahin khuun zakhmon se aise kahin naakhunon ki bhi kaavish hui hai hamein 'ishq mein mubtalaa kar rahe hain nazar aur dil mein ye saazish hui hai vahaan dushmanon ki baDi yaad aai jahaan doston ki navaazish hui hai vafaa-daariyon kaa sila mil rahaa hai hamaari sadaa aazmaaish hui hai pareshaaniyon mein jo ham mubtalaa hain yaqinan koi ham se laghzish hui hai vahin apni aankhon ko ham chhoD aae jahaan manzaron ki numaaish hui hai raqibon ko hai chhuT mahfil mein un ki mire aane jaane pe bandish hui hai ghazal kahnaa 'faaruq' main chhoD dungaa isi baat par un se ranjish hui hai"

"jab se aayaa huun tere gaanv mein rang hi rang hain fazaaon mein aa ki dukh sukh ki koi baat karein baiTh kar shishamon ki chhaanv mein main bhi kartaa huun zabt ki koshish to bhi takhfif kar adaaon mein vo tiraa dafatan bichhaD jaanaa vo miraa dekhnaa khalaaon mein ho agar koi gosh-bar-aavaaz ik khamoshi bhi hai sadaaon mein yahi mere liye ghanimat hai saans le luun khuli fazaaon mein"

"bas ki ik lams ki ummid pe vaare hue hain so tire saamne ye khaak pasaare hue hain jaane kab un ko bujhaa baiThe koi baad-e-alam sar-e-mizhgaan-e-tamannaa jo sitaare hue hain zindagi tu bhi hamein vaise hi ik roz guzaar jis tarah ham tujhe barson se guzaare hue hain nit-nae naqsh karein us pe aziyyat ke raqam aa ki ham takhti-e-dil apni pachaare hue hain kab kuchal jaaein kisi paanv se ham barg-e-vajud vaqt ki dhuup mein vaise hi karaare hue hain jaante hain ki tu hi ishq-badan ko hai libaas ham tiraa ruup jo aashuftagi dhaare hue hain apni jurat ki sataaish ho ki ham chob-mizaaj rabt rakhte hain sadaa un se jo aare hue hain"