"dil-e-be-mudda.ā kā mudda'ā kyā use yaksāñ ravā kyā nāravā kyā jinheñ har saañs bhī ik marhala hai unheñ raas aa.e duniyā kī havā kyā koī suntā nahīñ hai muflisoñ kī ġharīboñ kā payambar kyā ḳhudā kyā nigāh-e-dost meñ jachtā nahīñ jab to phir maiñ kyā mirā zehn-e-rasā kyā baḌā achchhā kyā aaj aa ga.e tum chalo chhoḌo na aa.e kal huā kyā jo ḳhud dast-e-talab phailā rahā ho sakhī bhī ho to us kā aasrā kyā agar majbūr hai jiine par insāñ to phir kaise kaTe ye sochnā kyā"
"ġham ko vaj.h-e-hayāt kahte haiñ aap bhī ḳhuub baat kahte haiñ aap se hai vo yā hamīñ se hai ham jise kā.enāt kahte haiñ kor-zauqī kī intihā ye hai log din ko bhī raat kahte haiñ ye ġhalat kyā hai tajrabe ko agar hāsil-e-hādsāt kahte haiñ bach nikalnā fareb-e-hastī se bas isī ko najāt kahte haiñ jis mohabbat pe hai madār-e-hayāt us ko bhī be-sabāt kahte haiñ vo mire she'r hī to haiñ 'sho.ala' jin ko qand-o-nabāt kahte haiñ"
All Writings Of Davarka Das Shola"nahīñ kahte kisī se hāl-e-dil ḳhāmosh rahte haiñ ki apnī dāstāñ meñ tere afsāne bhī aate haiñ vo jin par faḳhr hai farzāngī ko nukta-dānī ko tirī mahfil meñ aise chand dīvāne bhī aate haiñ adab kartā huuñ masjid kā vahāñ har roz jaatā huuñ ki us kī raah meñ do-chār maiḳhāne bhī aate haiñ hamāre mai-kade meñ mai bhī hai īmāñ kī bāteñ bhī yahīñ to ek sāhab va.az farmāne bhī aate haiñ na ghabrā chāhne vāloñ se ye to ain-e-fitrat hai ki sham.a nūr-afshāñ ho to parvāne bhī aate haiñ"
All Writings Of Davarka Das Shola"zarā nigāh uThāo ki ġham kī raat kaTe nazar nazar se milāo ki ġham kī raat kaTe ab aa ga.e ho to mere qarīb aa baiTho duī ke naqsh miTāo ki ġham kī raat kaTe shab-e-firāq hai sham-e-umīd le aao koī charāġh jalāo ki ġham kī raat kaTe kahāñ haiñ sāqī-o-mutrib kahāñ hai pīr-e-haram kahāñ haiñ sab ye bulāo ki ġham kī raat kaTe kahāñ ho mai-kade vaalo zarā idhar aao hameñ bhī aaj pilāo ki ġham kī raat kaTe nahīñ kuchh aur jo mumkin to yaar 'shola' kī koī ġhazal hī sunāo ki ġham kī raat kaTe"
All Writings Of Davarka Das Shola"apnī bechārgī pe ro na sake tere kyā hote apne ho na sake zindagī aur vo bhī māñge kī ham nadāmat kā daaġh dho na sake ḳhud-farebī kī intihā ye hai dil sī bekār shai bhī kho na sake nā-ḳhudā ke baġhair kuchh na banā apnī kashtī bhī ḳhud Dubo na sake"
All Writings Of Davarka Das Shola"merī manzil kahāñ hai kyā ma.alūm intihā ġham hai ibtidā ma.alūm tum nahīñ mere ab ye raaz khulā maiñ tumhārā huuñ ab huā ma.alūm dil kī parvā kare koī kab tak chāhtā kyā hai ye ḳhudā ma.alūm duur se gul ko dekhnā kyā hai yuuñ to hotā hai ḳhushnumā ma.alūm paas aa.e to asl husn khule duur kī chiiz rāz-e-nā-ma.alūm tum ko chāhā baḌā qusūr kiyā sahv zāhir hai aur ḳhatā ma.alūm baat bantī nazar nahīñ aatī un ke tevar se ho gayā ma.alūm vaz.a-dārī se chup rahūñ varna hai mujhe raaz aap kā ma.alūm kaun hai jis ko ḳhū-e-e-maulā kā rāz-e-sar-basta ho sakā ma.alūm is qadar jald maut aa.egī haa.e insāñ ko ye na thā ma.alūm maiñ vafā bhī karūñ gile bhī karūñ mujh ko hotā hai ye burā ma.alūm kyā kaheñ kis liye rahe ma.atūb ham ko ab tak nahīñ ḳhatā ma.alūm chal ke 'sho.ala' se pūchhiye kyūñkar jurm sābit huā sazā ma.alūm"
All Writings Of Davarka Das Shola"insāñ ba-yak nigāh burā bhī bhalā bhī hai ya.anī vo musht-e-ḳhāk to hai kīmiyā bhī hai ai ġham-nasīb kis se hai mumkin tirā ilaaj ai bad-nasīb tere maraz kī davā bhī hai kyuuñ kar kaheñ ki jis ko ḳhudā.ī na thī qubūl vo be-niyāz aap ke dar kā gadā bhī hai tere vajūd se bhalā inkār ho kise ai tū ki zarre zarre meñ jalva-numā bhī hai banda-navāziyoñ pe na itrā.iye bahut banda-navāz aap se baḌh kar ḳhudā bhī hai sho.ala se duur rahiye ki shā.ir sahī magar ziddī hai bevaqūf hai dil kā burā bhī hai"
All Writings Of Davarka Das Shola