haath meñ māhtāb ho jaise — Shayari Of Abid Wadood

"phaTā huā jo garebāñ dikhā.ī detā hai kisī kā dard numāyāñ dikhā.ī detā hai nikalnā chāhtā huuñ jism ke hisār se maiñ ki apnā tan mujhe zindāñ dikhā.ī detā hai sarā-e-dahr meñ Thahrā huā musāfir huuñ ajiib be-sar-o-sāmāñ dikhā.ī detā hai tire laboñ ke tabassum ko kis se duuñ tashbīh ki ġhuncha bhī to pareshāñ dikhā.ī detā hai har ek shaḳhs kisī ḳhauf kī giraft meñ hai tamām shahr hirāsāñ dikhā.ī detā hai jo ho sake to kabhī us kī ruuh meñ jhāñko qabā pahan ke jo uryāñ dikhā.ī detā hai ma.āsh aisī ki sunsān haiñ galī bāzār bhaTaktā aisā ki insāñ dikhā.ī detā hai"

"apne andar bhī ham-navā.ī nahīñ aql kī ruuh tak rasā.ī nahīñ saudā-bāzī agar na ho is meñ nekī karne meñ kuchh burā.ī nahīñ har adā se adā nikaltī hai itnī āsān āshnā.ī nahīñ ham se qaa.em hai tere husn kī shaan ye mirī jaan! ḳhud-satā.ī nahīñ kitnā tanhā huuñ dasht-e-ġhurbat meñ merā bhaa.ī bhī merā bhaa.ī nahīñ kisī unvān se kabhī 'ābid' zindagī ham ko raas aa.ī nahīñ"

"shiddat bahār kī bhī gavārā nahīñ mujhe phūloñ ke toḌne kā bhī yaarā nahīñ mujhe maujoñ se kheltā huuñ irādoñ kā daur hai maujoñ meñ ārzū-e-kināra nahīñ mujhe maiñ gir paḌā thā raah meñ chalte hue magar phir bhī to dostoñ ne pukārā nahīñ mujhe kis din chubhī nahīñ haiñ masā.ib kī kirchiyāñ kis din tumhāre ġham ne sañvārā nahīñ mujhe rahtā huuñ ārzūoñ ke chhoTe se shahr meñ ḳhush huuñ ki ārzū-e-buḳhārā nahīñ mujhe tum merī jaañ ho jaañ kā bharosā magar nahīñ ya.anī ki e'tibār tumhārā nahīñ mujhe"

"jab se dariyā meñ hai tuġhyānī bahut paar jaane meñ hai āsānī bahut koī manzar bhī nahīñ achchhā lagā ab ke āñkhoñ meñ hai vīrānī bahut apnī qīmat to nahīñ lekin yahāñ aise gauhar kī hai arzānī bahut khet haiñ banjar to sahrā be-numū varna dariyāoñ meñ hai paanī bahut us ke chehre par mirī āñkheñ sajīñ mere chehre par thī hairānī bahut kyā ḳhulūs-o-mehr kī bāteñ kareñ zindagī meñ hai pashemānī bahut har kisī ko 'ilm hai 'ābid-vadūd' bāteñ us kī jānī-pahchānī bahut"

"charāġh bujh bhī chukā raushnī nahīñ jaatī vo saath saath hai aur bekalī nahīñ jaatī shabāb-e-rafta phir aatā nahīñ javānī par ye vo makāñ hai ki jis ko galī nahīñ jaatī ajiib dar-badarī meñ guzar rahī hai hayāt ki apne ghar meñ bhī ab be-gharī nahīñ jaatī chaman ko chāroñ taraf gher kar nahīñ rakhnā sabā guloñ kī taraf kab chhupī nahīñ jaatī chalo usī se kareñ baat chārāgar to hai vo jis se baat kisī kī sunī nahīñ jaatī matā-e-dard numū ke safar meñ hai shāmil kalī bahār meñ vaise jalī nahīñ jaatī fishār-e-vaqt meñ nok-e-qalam huī larzāñ lahū ke shor meñ dil kī kahī nahīñ jaatī tamām shahr ra.ūnat kī gard meñ malfūf aur ek ham haiñ ki vāraftagī nahīñ jaatī"

"jaane kis samt ko bhaTkā saaya dhuup kahne lagī sāya! sāya! koī sarnāma hamārā likkhe raḳhsh par ham to piyāda saaya sar-e-be-maġhz ke auhām to dekh jism apnā hai parāyā saaya ye adāvat hai hiqārat to nahīñ un kī dastār se rūThā saaya ba.az auqāt to aisā bhī huā chhin gayā ham se hamārā saaya ab to e.ajāz hai jiinā 'ābid' saa.e kā ho bhī bhalā kyā saaya"