Shayari Of Abid Wadood

"shiddat bahār kī bhī gavārā nahīñ mujhe phūloñ ke toḌne kā bhī yaarā nahīñ mujhe maujoñ se kheltā huuñ irādoñ kā daur hai maujoñ meñ ārzū-e-kināra nahīñ mujhe maiñ gir paḌā thā raah meñ chalte hue magar phir bhī to dostoñ ne pukārā nahīñ mujhe kis din chubhī nahīñ haiñ masā.ib kī kirchiyāñ kis din tumhāre ġham ne sañvārā nahīñ mujhe rahtā huuñ ārzūoñ ke chhoTe se shahr meñ ḳhush huuñ ki ārzū-e-buḳhārā nahīñ mujhe tum merī jaañ ho jaañ kā bharosā magar nahīñ ya.anī ki e'tibār tumhārā nahīñ mujhe"

"jab se dariyā meñ hai tuġhyānī bahut paar jaane meñ hai āsānī bahut koī manzar bhī nahīñ achchhā lagā ab ke āñkhoñ meñ hai vīrānī bahut apnī qīmat to nahīñ lekin yahāñ aise gauhar kī hai arzānī bahut khet haiñ banjar to sahrā be-numū varna dariyāoñ meñ hai paanī bahut us ke chehre par mirī āñkheñ sajīñ mere chehre par thī hairānī bahut kyā ḳhulūs-o-mehr kī bāteñ kareñ zindagī meñ hai pashemānī bahut har kisī ko 'ilm hai 'ābid-vadūd' bāteñ us kī jānī-pahchānī bahut"

"terī duniyā kī kaj-adā.ī se laḌ rahā huuñ bharī ḳhudā.ī se husn hai aap apnī ārā.ish husn ghaTtā hai ḳhud-numā.ī se ham ne qadmoñ ko duur rakkhā hai har badī se har ik burā.ī se dil hī TuuTā hai kuchh nahīñ bigḌā aap kī tarz-e-bevafā.ī se bad-gumānī kā daur hai 'ābid' bhaa.ī hai bad-gumān bhaa.ī se"

"apne andar bhī ham-navā.ī nahīñ aql kī ruuh tak rasā.ī nahīñ saudā-bāzī agar na ho is meñ nekī karne meñ kuchh burā.ī nahīñ har adā se adā nikaltī hai itnī āsān āshnā.ī nahīñ ham se qaa.em hai tere husn kī shaan ye mirī jaan! ḳhud-satā.ī nahīñ kitnā tanhā huuñ dasht-e-ġhurbat meñ merā bhaa.ī bhī merā bhaa.ī nahīñ kisī unvān se kabhī 'ābid' zindagī ham ko raas aa.ī nahīñ"

"havā ke ruḳh pe khulā bādbāñ añdhere kā yahāñ pe naam nahīñ ab kisī savere kā uThā ke le gayā sarvat kabhī kā hai jogī koī surāġh nahīñ ab usī ke phere kā havā-e-garm ke tapte libās meñ pahroñ vo saaya Tāñktā hai har shajar ghanere kā har ek shāḳh se sandal ke saañp haiñ lipTe asar pazīr nahīñ koī dam sapere kā sukūt vo hai ki jāmid hai lamha-e-maujūd hayāt ḳhvāb ho jaise kisī luTere kā har ek saañs pe dhaḌkā hai maut kā 'ābid' ye zindagī hai ki hai ghar kisī vadere kā"

"haath meñ māhtāb ho jaise khulī ā.ankhoñ meñ ḳhvāb ho jaise mere ham-sā.e meñ jo rahtā hai mujh sā ḳhāna-ḳharāb ho jaise chāñd niklā to is qarīne se ik hasīñ be-hijāb ho jaise ham-safar DhūñDne ko niklā huuñ mausam-e-intiḳhāb ho jaise yuuñ gunāhoñ kī yaad aatī hai aaj yaum-e-hisāb ho jaise aañkh muddat se tar nahīñ 'ābid' ḳhushk apnā chanāb ho jaise"

"jab bhī tanhā.ī kabhī hotī hai hāsil mujh ko vaqt rakh detā hai mere hī muqābil mujh ko āḳhirī umr kī uftād ga.ī tab.a kī ḳhair raas aatā hai alam-zār na mahfil mujh ko ek baar aur maiñ jī pā.ūñ to shāyad hal hoñ zindagānī ne diye aise masā.il mujh ko ishq itnā bhī hai kaafī ki tujhe chāhtā huuñ itnā hāsil hai to kyā kuchh nahīñ hāsil mujh ko jab bahār aa.ī tavānā.ī bhī vāpas aa.ī qaid meñ rakh na sake band-o-salāsil mujh ko itnī ūñchā.ī se to merī zabūñ-hālī dekh jitnī duurī se nazar aatā hai sāhil mujh ko mujh ko ma.azūr banātī hai mirī kam-yābī nazar aatā hai ḳharīdār na saa.il mujh ko maiñ tire lutf se nādim huuñ magar arz hai ye ab samundar se banānā nahīñ sāhil mujh ko maiñ ne kashkol jo hāthoñ meñ liyā to 'ābid' saarī duniyā nazar aane lagī saa.il mujh ko"

"vaqt ke saath zindagī kā dukh mire sar par hai har ḳhushī kā dukh apne zaḳhmoñ ko bhuul jaatā huuñ dekh letā huuñ jab kisī kā dukh lailā-e-har-suḳhan pareshāñ hai jab qalam meñ hai be-kasī kā dukh ham-safar ab nahīñ koī merā merā sāthī hai ham-rahī kā dukh aaj me.arāj ho ga.ī merī aaj bāñTā hai bandagī kā dukh zindagī saarī bandagī merī merā sajda hai aadmī kā dukh tere shams-o-qamar mire kis kaam mere ghar meñ hai tīrgī kā dukh mar gayā apne vāste farhād us ne kab sar liyā kisī kā dukh kah rahī hai numūd kī har lai band kaliyoñ meñ hai namī kā dukh har talab se gurez-pā ik shaḳhs chāTtā hai rahī sahī kā dukh zindagī saarī rog meñ guzrī thā ba-zāhir jo ik ghaḌī kā dukh har koī us kā saath detā hai jo nahīñ bāñTtā kisī kā dukh vo sharīk-e-safar nahīñ hotā maiñ uThātā huuñ dostī kā dukh yād-e-yārāñ lahū rulā.egī aur phir ek ajnabī kā dukh ghaT gayā chāñd raushnī maddham merī āñkhoñ meñ raushnī kā dukh jaan par ban ga.ī ki aalam par jaan levā hai āgahī kā dukh"

"na ghar sukūn-kada hai na kārḳhāna-e-ishq magar ye ham haiñ ki likhte rahe haiñ nāma-e-ishq bahut se naam the ab koī yaad aatā nahīñ hamāre dil meñ rahā dafn ik ḳhazāna-e-ishq sab apne apne tarīqe se bhiik māñgte haiñ koī ba-nām-e-mohabbat koī ba-jāma-e-ishq tumhī pe kyā ki ham ab ḳhud pe bhī nahīñ khulte to kyā ye kam hai ki ham par khulā fasāna-e-ishq ka.ī zamāne ga.e aur badal gayā sab kuchh magar kabhī nahīñ badlā tirā zamāna-e-ishq sulagte rahne kī lazzat use kahāñ ma.alūm ki jab talak koī bantā nahīñ nishāna-e-ishq use phir apnī ḳhabar bhī nahīñ rahī 'ābid' lagā hai jis ko bhī ik baar tāziyāna-e-ishq"

"zaḳhm ke rañg haiñ kyā merī ridā jāntī hai kis ne kī kis se vafā ḳhud ye vafā jāntī hai ab qafas aur gulistāñ meñ koī farq nahīñ ham ko ḳhushbū kī talab hai ye sabā jāntī hai ḳhud-parastī ke mahallāt meñ rahne vaalo zalzala aane ko hai larzish-e-pā jāntī hai maiñ nahīñ jāntā daryūza-garī ko lekin mere lab par hai duā kyā ye duā jāntī hai kashtī-e-umr mirī Dol rahī hai 'ābid' sāhil-e-zīst kī ālūda havā jāntī hai"

"jaane kis samt ko bhaTkā saaya dhuup kahne lagī sāya! sāya! koī sarnāma hamārā likkhe raḳhsh par ham to piyāda saaya sar-e-be-maġhz ke auhām to dekh jism apnā hai parāyā saaya ye adāvat hai hiqārat to nahīñ un kī dastār se rūThā saaya ba.az auqāt to aisā bhī huā chhin gayā ham se hamārā saaya ab to e.ajāz hai jiinā 'ābid' saa.e kā ho bhī bhalā kyā saaya"

"charāġh bujh bhī chukā raushnī nahīñ jaatī vo saath saath hai aur bekalī nahīñ jaatī shabāb-e-rafta phir aatā nahīñ javānī par ye vo makāñ hai ki jis ko galī nahīñ jaatī ajiib dar-badarī meñ guzar rahī hai hayāt ki apne ghar meñ bhī ab be-gharī nahīñ jaatī chaman ko chāroñ taraf gher kar nahīñ rakhnā sabā guloñ kī taraf kab chhupī nahīñ jaatī chalo usī se kareñ baat chārāgar to hai vo jis se baat kisī kī sunī nahīñ jaatī matā-e-dard numū ke safar meñ hai shāmil kalī bahār meñ vaise jalī nahīñ jaatī fishār-e-vaqt meñ nok-e-qalam huī larzāñ lahū ke shor meñ dil kī kahī nahīñ jaatī tamām shahr ra.ūnat kī gard meñ malfūf aur ek ham haiñ ki vāraftagī nahīñ jaatī"