paanī meñ chhap-chhayyā kartī shor machātī shaam — Shayari Of Ishrat Afreen

"vo harf thā na sitāra magar chamaktā thā ki mere zard gulāboñ ke biich mahkā thā vo aañkh sach thī magar e'tibār-e-ā.īna mirī nazar meñ to har 'aks reza-reza thā vo raushnī ki jise hiddatoñ se kaam na thā vo aa.ina ki jo sūraj ke ruḳh pe rakkhā thā vo sahn jis meñ tirī yaad ke parand utre vo shāḳh jis pe mire ḳhvāb kā baserā thā usī ko mausam-e-bārāñ kī chaah thī kyā kyā vo ek shāḳh jise bhiig kar sulagnā thā ye aur baat ki kam-hausla to maiñ bhī thī magar ye sach hai use pahle maiñ ne chāhā thā na mere haath hinā.ī na us ke ḳhvāb gulāb to phir ye rang sā pairāhanoñ pe kaisā thā"

"vo aaj raat bhī ḳhalvat-sarā meñ aaya nahīñ mujhe bhī zid thī so maiñ ne diyā bujhāyā nahīñ vo dard thā ki rag-o-pai kī jaan khiñchtī thī pa jaañ se jaane kā mausam to phir bhī aaya nahīñ tamām raat maiñ apnī hī raushnī meñ jalī tamām raat kisī ne mujhe bujhāyā nahīñ bas ek baar un āñkhoñ meñ dekh paa.ī thī phir us ke baa'd kabhī aa.ina uThāyā nahīñ mohabbatoñ meñ mashaqqat bahut thī so tum ne mire ḳhayāl se shāyad mujhe thakāyā nahīñ havā ne raat jo zanjīr-e-dar hilā.ī thī phir us ke baa'd kisī ne mujhe satāyā nahīñ"

"dhuup dīvāroñ se jab bāteñ kare ghar kī vīrānī 'ajab bāteñ kare din to apnā ik khilañDrā dost hai shab vo ham-jolī jo sab bāteñ kare mujh meñ ik mā'sūm sī bachchī jo hai mujh se pahroñ be-sabab bāteñ kare ek saaya aa lage dīvār se aur divāna roz-o-shab bāteñ kare kaun samjhe chashm-o-abrū kī zabāñ koī kis se zer-e-lab bāteñ kare sub.h 'ujlat shaam yak-gūna thakan phir batāo koī kab bāteñ kare"

"andar se TūTī-phūTī huuñ uupar se hañs bol rahī huuñ ik āseboñ vaale ghar meñ sapne rakh kar bhuul ga.ī huuñ is ḳhālī hotī bastī meñ kis kā rasta dekh rahī huuñ jaltī-bujhtī āñkheñ le kar kis kī aartī ko niklī huuñ miirā maañ maiñ vo bairāgan daan meñ aañsū hī paatī huuñ"

"haath mere haiñ na patthar mere sar hai kis vāste aazar mere fasl-e-gul ho ga.ī muflis aisī ḳhālī haath aa.ī hai ye ghar mere ab ke barsāt meñ aisī TuuTī titliyāñ le ke uḌiiñ par mere bhīgtī raat ke sā.e-sā.e aaj tum aa.e nahīñ ghar mere laakh patthar huuñ magar laḌkī huuñ phuul hī phuul haiñ andar mere maiñ huuñ injīl-e-vafā kī tanzīl ai mohabbat ke payambar mere maiñ huuñ sachchā.ī ke do-rāhe par koī pahuñchā.e mujhe ghar mere aa ki in āñkhoñ ke hisse kar leñ sīpiyāñ terī hoñ guhar mere"

"ḳhvāb meñ kal ye ḳhvāb aaya hai maiñ ne tumheñ chhūkar dekhā hai maiñ parbat se phisal ga.ī huuñ tum ne baḌh kar thaam liyā hai mujh meñ ek ghanā jangal hai us jangal meñ ik kuTiyā hai us kuTiyā meñ ik jogī hai us jogī kī 'ajab kathā hai gale meñ hai sadiyoñ kī maalā hāthoñ meñ dhartī pyāla hai pyāle meñ jīvan amrit hai vo amrit jo maiñ ne piyā hai maiñ us ke charnoñ meñ baiThī aur ākāsh mujhe taktā hai uḌne ko par tol rahī huuñ lekin bāhar tez havā hai dhartī mujh ko rok rahī hai parbat mujh ko khīñch rahā hai apnā aap tamāsha huuñ maiñ dekhnā hai ab kyā hotā hai"