jo ab javaan hai vo azm-e-javaan rahe na rahe — All Writings Of Nihal Rizvi

"hisaar-e-jism se aazaad hone vaalaa huun kisi ko paa ke kisi shai ko khone vaalaa huun jo miT gae hain vo aqdaar jama karne hain bikhar gae hain jo moti pirone vaalaa huun hai qaht-e-aab kaa manzar to chaar-su lekin main apni chashm-e-haqiqat bhigone vaalaa huun main apne dard ke tufaan dabaae siine mein hansaa chukaa huun zamaane ko rone vaalaa huun ye jaantaa huun phir ik baar koi kaaTegaa vafaa ki fasl phir ik baar bone vaalaa huun ye jaan kar bhi nadi par nazar Tikaae huun saraab ban ke saraabon mein khone vaalaa huun hazaar din mein main suraj banaa phirun phir bhi siyaah raat ke maqtal mein khone vaalaa huun thapak thapak ke sulaate hain is liye hi 'nihaal' ki khvaab jaan gae hain main sone vaalaa huun"

"gher kar jurat-e-inkaar talak le aae log ham ko rasan-o-daar talak le aae ham ko un par hi bharosa thaa jo aksar ham ko de ke phulon ki qasam khaar talak le aae dil ke amraaz ye dekhaa hai ki darmaan ke liye ek bimaar ko bimaar talak le aae rok paai na zabaan bhi miri alfaaz mire valvale quvvat-e-izhaar talak le aae aasmaan ham ne banaae the jo apni khaatir ham jahaan ko usi meaar talak le aae rah gayaa mal ke samundar kaf-e-afsos aur ham naav us paar se is paar talak le aae thaa hamein shauq-e-asiri na samajhnaa ye 'nihaal' lu ke jhonke dar-o-divaar talak le aae"

"dhuup kyunkar na ho itaab-zada saaya saaya hai aaftaab-zada niind aanaa vahaan buraa kyon hai jaagnaa bhi jahaan ho khvaab-zada hai tabhi se hujum saahil par jab se tufaan hue habaab-zada bahr ki kaifiyat khudaa ki panaah qatra qatra hai sail-e-aab-zada le ke rone se muskuraane tak kyaa nahin aaj iztiraab-zada kaise aakhir shanaakht karte ham dost dushman the sab naqaab-zada be-maza imtihaan-e-zist huaa har savaal aa gayaa javaab-zada khul ke milte 'nihaal' kyaa jis ki be-hijaabi bhi thi hijaab-zada"

"mujh ko shaahi nahin taufiq-e-faqiraana de rakh mujhe bazm mein chaahe mujhe viraana de bhar de bharnaa hai agar ishq kaa saudaa sar mein mujh ko denaa hai agar jurat-e-rindaana de aakhirash had bhi hai isaar ki koi ki nahin shama par jaan kahaan tak koi parvaana de main haqiqat ki tahein khol ke rakh saktaa huun mujh ko tartib to dene koi afsaana de ye na uTTheinge kabhi sath se apni uupar in khirad vaalon ko shah kitni bhi divaana de adl-o-insaaf ravaa taaki dobaara ho jaaein faisla karne na munsif ko bhi man-maanaa de tu jo chaahe to badal jaae jahaan ki tasvir inhin shaahon ko jo ehsaas-e-faqihaana de kis ko apnaa kahein aur ghair kahein kis ko 'nihaal' de na apnaa koi kuchh aur na begaana de"

"koi shoala hai ki shabnam nahin dekhaa jaataa jaada-e-ishq pe mausam nahin dekhaa jaataa aanaa hotaa hai to aa jaataa hai tufaan zarur khushk saahil hai ki hai nam nahin dekhaa jaataa dekhaa jaataa hai ki kaun aa gayaa manzil pahle raah mein kis ne liyaa dam nahin dekhaa jaataa dekhaa jaataa hai diye kis ne jalaae kitne sirf zulmaat kaa maatam nahin dekhaa jaataa haal bhi saaf nazar aae zaruri hai 'nihaal' sirf maazi hi kaa album nahin dekhaa jaataa"

"ham samajhte hain jise apnaa jahaan kuchh aur hai ye zamin kuchh aur hai ye aasmaan kuchh aur hai ji rahe hain ham jise naachiz hai vo zindagi ye ghubaar-e-kaarvaan hai kaarvaan kuchh aur hai kar rahaa huun main adaa kirdaar jis mein khud bhi ek vo to afsaana hai meri daastaan kuchh aur hai reg-zaaron par tu jo chaahe banaa le naqsh-e-paa pattharon par jo ubhar aae nishaan kuchh aur hai saaebaan hi dushman-e—azm-e-safar honge 'nihaal' imtihaan aasaan na samjho imtihaan kuchh aur hai"