jur.at-e-‘arz-e-hāl kartā huuñ — All Writings Of Abdur Rasheed Khan Kaifi Mahkari

"qafas tak bhī pahuñch hai yā faqat ik āshiyāñ tak hai rasā.ī dekhnī hai barq-e-sozāñ kī kahāñ tak hai mujhe lazzat-kash-e-bedād pā kar haath kyoñ rokā zarā to āzmāte hausla dil kā kahāñ tak hai yaqīñ apnī vafā par hai taġhāful kā nahīñ shikva tirī begāngī ham jānte haiñ imtihāñ tak hai nasheman phūñk kar zālim havā detā hai dāman kī ġhubār-e-ḳhātir-e-sayyād ḳhāk-e-āshiyāñ tak hai zarā sā dil hai lekin jaan hai bazm-e-do-ālam kī ye saarī garmī-e-hangāma qalb-e-nā-tavāñ tak hai shikast-e-dil kā baa.is ārzū-e-dil ko Thahrāyā gumān-e-nek tujh se bad-gumāñ dekhā kahāñ tak hai yahī rūh-e-tamanna hai yahī hai jān-e-dil 'kaifī' qafas meñ zindagī apnī ḳhayāl-e-āshiyāñ tak hai"

"sitam ke parde meñ phir karam kar sukūn ko iztirāb kar de dil-e-fasurda ko zindagī de shabāb ko phir shabāb kar de ye maanā lākhoñ hikāyateñ haiñ hazāroñ dil meñ shikāyateñ haiñ magar kaheñ kyā jo ik nazar meñ koī hameñ lā-javāb kar de Thahar dil-e-be-qarār dam bhar vo aa.e haiñ be-hijāb ho kar sambhal ki ye iztirāb-e-nau hī kahīñ na haa.il naqāb kar de vo ālam-e-be-ḳhudī ho dil par vo kaifiyat be-hisī kī chhā.e jo ārzū-e-karam miTā de jo be-niyāz-e-itāb kar de na aa.egā lab pe harf-e-matlab na khul sakegī zabān-e-'kaifī' nigāh-e-hasrat ko tarjumāñ kar ḳhamoshiyoñ ko javāb kar de"

"na de fareb-e-vafā le na imtihāñ apnā hai be-niyāz-e-karam yār-e-bad-gumāñ apnā pahuñch chuke the sar-e-shāḳh-e-gul asiir hue luTā hai sāmne manzil ke kārvāñ apnā har ek zarra-e-ālam hai aur sajda-e-shauq rakheñ uThā ke vo ab sañg-e-āstāñ apnā vahī hai ālam-e-afsurdagī vahī ham haiñ ḳhushī kā jis meñ guzar ho vo dil kahāñ apnā nigāh-e-yās hai tafsīr-e-sad-hazār niyāz sukūt laakh bayānoñ kā ik bayāñ apnā fareb hī sahī taskīn kuchh to hai dil ko rahe ḳhudā kare qaa.em yūñhī gumāñ apnā vafā kā naam hī duniyā se uTh chukā 'kaifī' kahāñ zamāne meñ ab koī qadr-dāñ apnā"

"imtihāñ zabt kā phir bazm-e-gah-e-nāz meñ hai jalva-e-tūr nigāh-e-ġhalat-andāz meñ hai ahl-e-dil dīda-e-tar dekh ke pahchān ga.e maiñ samajhtā thā mirī baat abhī raaz meñ hai āshiyāne ko nahīñ barq-navāzī se panāh ek hī lutf vahī soz meñ hai saaz meñ hai mere miTne kā kareñ sog kisī ke dushman kyuuñ udāsī sī kisī jalva-gah-e-nāz meñ hai jān-e-naġhma hai mire TuuTe hue dil kī sadā ik yahī tār-e-shikasta hai jo har saaz meñ hai gul-o-bulbul se adāvat nahīñ 'kaifī' lekin kyuuñ huuñ bezār chaman se ye abhī raaz meñ hai"

"ḳhayāl-e-pursish-e-fardā se ghabrānā nahīñ aatā gunah kartā huuñ lekin mujh ko pachhtānā nahīñ aatā yaqīn-e-da.avā-e-ulfat nahīñ maanā nahīñ aatā magar ye bhī to hai jhūToñ ko jhuTlānā nahīñ aatā tabī.at hai ġhayūr aisī ki tishna-kām rahtā huuñ lagī-lipTī kisī kī sun ke pī jaanā nahīñ aatā mirī nākāmiyāñ dil kā chaman shādāb rakhtī haiñ ye vo kaliyāñ haiñ jin ko khil ke murjhānā nahīñ aatā kisī ke vāda-e-bātil se taskīñ ho nahīñ saktī khilaune de ke mujh ko dil kā bahlānā nahīñ aatā vafā kī dāstāñ duniyā meñ 'kaifī' kab nahīñ chhiḌtī zabān-e-ḳhalq par kab merā afsāna nahīñ aatā"

"phir vahī lutf-e-ḳhalish ho vahī sozish dekhūñ kyā bigāḌegī mirā charḳh kī gardish dekhūñ tarz-e-bedād ne kuchh lutf diyā hai aisā phir ye hasrat hai unheñ garm-e-navāzish dekhūñ aap kī chashm-e-fusūñ-gar kā karam kyā kam hai ab bhalā kis liye aflāk kī gardish dekhūñ chashm-e-maḳhmūr kī kyā hosh-rubā.ī kam hai hasrat-e-bāda karūñ jaam kī gardish dekhūñ vo na aa.e na sahī ḳhud mujhe kab hai manzūr dil-e-bīmār ko minnat-kash-e-pursish dekhūñ ḳhūn-e-dil se ye ġhazal aaj likhī hai 'kaifī' rang kyā lā.egā ye tarz-e-nigārish dekhūñ"