qafas tak bhī pahuñch hai yā faqat ik āshiyāñ tak hai — All Writings Of Abdur Rasheed Khan Kaifi Mahkari

"maḳhmūr-e-adā-e-sāqī hai mahrūm dil-e-nākām nahīñ khiñch aa.ī hai mere sāġhar meñ vo mai jo rahīn-e-jām nahīñ ai qadr-shanās-e-jins-e-girāñ bas ek nazar hai qīmat-e-dil yuuñ muft luTā.e dete haiñ kuchh sūd-o-ziyāñ se kaam nahīñ duniyā-e-chaman hai pesh-e-nazar phirtā hai samāñ āñkhoñ meñ vahī ham laakh raheñ pāband-e-qafas kuchh dil to asīr-e-dām nahīñ kyoñ daaġh lahū ke dhote ho kyoñ zīnat-e-dāman khote ho bekār pareshāñ hote ho tum par to koī ilzām nahīñ vo mahv-e-taġhāful suntā hai ham kahte haiñ dil kā afsāna kuchh bāteñ haiñ bahkī bahkī sī āġhāz nahīñ anjām nahīñ hai kis kā jigar ye dard sahe hai tīr-e-nazar kī taab kise maḳhsūs hai mere dil ke liye ye lutf-e-ḳhalish kuchh aam nahīñ yā ham hī nahīñ shāyān-e-jafā yā us ko nahīñ hai qadr-e-vafā is bazm meñ 'kaifī' varna koī mahrūm nahīñ nākām nahīñ"

"aap ko gar kuchh ḳhayāl-e-vā'da-e-bāham rahe mubtalā-e-ārzū kyoñ mubtalā-e-ġham rahe kar taḌapne meñ madad ai dil ki Thānī ham ne hai aaj qaid-e-ġham rahe yā mubtalā-e-ġham rahe phir vahī āshuftagī ho phir vahī dīvāngī dil pe yārab phir junūn-e-ishq kā 'ālam rahe is pashemānī pe qurbāñ kyā karūñ jaañ bhī nahīñ mere mar jaane pe koī mubtalā-e-ġham rahe phir vahī rang-e-parastish hai vahī tarz-e-vafā phir kisī ke āstāñ par apnī gardan ḳham rahe taab lā.ūñ diid kī 'kaifī' ye mumkin hai kahāñ nayyar-e-tābāñ ke aage qatra-e-shabnam rahe"

"phir vahī lutf-e-ḳhalish ho vahī sozish dekhūñ kyā bigāḌegī mirā charḳh kī gardish dekhūñ tarz-e-bedād ne kuchh lutf diyā hai aisā phir ye hasrat hai unheñ garm-e-navāzish dekhūñ aap kī chashm-e-fusūñ-gar kā karam kyā kam hai ab bhalā kis liye aflāk kī gardish dekhūñ chashm-e-maḳhmūr kī kyā hosh-rubā.ī kam hai hasrat-e-bāda karūñ jaam kī gardish dekhūñ vo na aa.e na sahī ḳhud mujhe kab hai manzūr dil-e-bīmār ko minnat-kash-e-pursish dekhūñ ḳhūn-e-dil se ye ġhazal aaj likhī hai 'kaifī' rang kyā lā.egā ye tarz-e-nigārish dekhūñ"

"na pūchh ai ham-nafas afsāna-e-rañj-o-mehan merā na hai bas meñ zabāñ merī na qaabū meñ dahan merā shamīm-e-zulf ne mahkā diyā dil kā har ik gosha jo bikhrīñ yaar kī zulfeñ banā pallū ḳhutan merā satā le jitnā jī chāhe magar itnā samajh rakhnā rasā hogā kabhī to naala ai charḳh-e-kuhan merā na dāman hī salāmat hai na jeb-o-āstīñ baaqī huā hai nazr-e-ḳhār-e-dasht saarā pairahan merā hare phir kar diye zaḳhm-e-jigar abr-e-bahārāñ ne huā shādāb do chhīñToñ meñ ye ujḌā chaman merā vo kahte haiñ kaho jo kuchh tumheñ kahnā ho ai 'kaifī' magar tāqat kahāñ se laa.e kahne kī dahan merā"

"ḳhū-e-talab kā dil se batānā kuchh aur hai ḳhuddāriyoñ kā apnī taqāzā kuchh aur hai sīmāb aur barq kī betābiyāñ bajā lekin dil-o-jigar kā machalnā kuchh aur hai maanā shafaq meñ surḳhī hai mastī sharāb meñ lekin tire shabāb kā naqsha kuchh aur hai maanā ki māh-o-anjum-o-gul haiñ bahut hasīñ lekin mirī nigāh ne dekhā kuchh aur hai ab kaif-o-imbisāt se 'kaifī' mujhe ġharaz lazzat-kash-e-alam huuñ tamannā kuchh aur hai"

"jur.at-e-‘arz-e-hāl kartā huuñ Darte Darte savāl kartā huuñ aap se ik savāl kartā huuñ sa'ī-e-amr-e-muhāl kartā huuñ ārzū-e-visāl kartā huuñ maiñ bhī kaisā ḳhayāl kartā huuñ shab kī ḳhāmoshī meñ akele meñ zikr-e-māzī-o-hāl kartā huuñ ḳhud hī de letā huuñ javāb un kā ḳhud hī dil se savāl kartā huuñ"