All Writings Of Abdur Rasheed Khan Kaifi Mahkari

"qafas tak bhī pahuñch hai yā faqat ik āshiyāñ tak hai rasā.ī dekhnī hai barq-e-sozāñ kī kahāñ tak hai mujhe lazzat-kash-e-bedād pā kar haath kyoñ rokā zarā to āzmāte hausla dil kā kahāñ tak hai yaqīñ apnī vafā par hai taġhāful kā nahīñ shikva tirī begāngī ham jānte haiñ imtihāñ tak hai nasheman phūñk kar zālim havā detā hai dāman kī ġhubār-e-ḳhātir-e-sayyād ḳhāk-e-āshiyāñ tak hai zarā sā dil hai lekin jaan hai bazm-e-do-ālam kī ye saarī garmī-e-hangāma qalb-e-nā-tavāñ tak hai shikast-e-dil kā baa.is ārzū-e-dil ko Thahrāyā gumān-e-nek tujh se bad-gumāñ dekhā kahāñ tak hai yahī rūh-e-tamanna hai yahī hai jān-e-dil 'kaifī' qafas meñ zindagī apnī ḳhayāl-e-āshiyāñ tak hai"

"imtihāñ zabt kā phir bazm-e-gah-e-nāz meñ hai jalva-e-tūr nigāh-e-ġhalat-andāz meñ hai ahl-e-dil dīda-e-tar dekh ke pahchān ga.e maiñ samajhtā thā mirī baat abhī raaz meñ hai āshiyāne ko nahīñ barq-navāzī se panāh ek hī lutf vahī soz meñ hai saaz meñ hai mere miTne kā kareñ sog kisī ke dushman kyuuñ udāsī sī kisī jalva-gah-e-nāz meñ hai jān-e-naġhma hai mire TuuTe hue dil kī sadā ik yahī tār-e-shikasta hai jo har saaz meñ hai gul-o-bulbul se adāvat nahīñ 'kaifī' lekin kyuuñ huuñ bezār chaman se ye abhī raaz meñ hai"

"na pūchh ai ham-nafas afsāna-e-rañj-o-mehan merā na hai bas meñ zabāñ merī na qaabū meñ dahan merā shamīm-e-zulf ne mahkā diyā dil kā har ik gosha jo bikhrīñ yaar kī zulfeñ banā pallū ḳhutan merā satā le jitnā jī chāhe magar itnā samajh rakhnā rasā hogā kabhī to naala ai charḳh-e-kuhan merā na dāman hī salāmat hai na jeb-o-āstīñ baaqī huā hai nazr-e-ḳhār-e-dasht saarā pairahan merā hare phir kar diye zaḳhm-e-jigar abr-e-bahārāñ ne huā shādāb do chhīñToñ meñ ye ujḌā chaman merā vo kahte haiñ kaho jo kuchh tumheñ kahnā ho ai 'kaifī' magar tāqat kahāñ se laa.e kahne kī dahan merā"

"ḳhayāl-e-pursish-e-fardā se ghabrānā nahīñ aatā gunah kartā huuñ lekin mujh ko pachhtānā nahīñ aatā yaqīn-e-da.avā-e-ulfat nahīñ maanā nahīñ aatā magar ye bhī to hai jhūToñ ko jhuTlānā nahīñ aatā tabī.at hai ġhayūr aisī ki tishna-kām rahtā huuñ lagī-lipTī kisī kī sun ke pī jaanā nahīñ aatā mirī nākāmiyāñ dil kā chaman shādāb rakhtī haiñ ye vo kaliyāñ haiñ jin ko khil ke murjhānā nahīñ aatā kisī ke vāda-e-bātil se taskīñ ho nahīñ saktī khilaune de ke mujh ko dil kā bahlānā nahīñ aatā vafā kī dāstāñ duniyā meñ 'kaifī' kab nahīñ chhiḌtī zabān-e-ḳhalq par kab merā afsāna nahīñ aatā"

"har ghaḌī ik na.ī musībat hai un kā aanā bhī kyā qayāmat hai dil hai nākāmiyoñ kī lazzat hai na tamannā hai ab na hasrat hai gaahe rāhat gahe musībat hai haa.e kyā chiiz ye mohabbat hai arz-e-matlab kī un se jur.at hai dil-e-nādāñ ye kyā qayāmat hai ġhair par bhī vahī hai rañg-e-sitam haañ mujhe aap se shikāyat hai baaz aao bhī ishq se 'kaifī' āfiyat bas isī meñ hazrat hai"

"aarzū ko salām karte haiñ dil kā qissa tamām karte haiñ aa sakegā na lab pe rāz-e-ishq husn kā ehtirām karte haiñ is fareb-e-ḳhayāl ke sadqe aap mujh se kalām karte haiñ ai falak kuchh to chain lene de do ghaḌī ko maqām karte haiñ ḳhaak bhī ab nahīñ shahīdoñ kī kyuuñ vo azm-e-ḳhirām karte haiñ sab hī dete haiñ jaan yuuñ 'kaifī' aap kyā aisā kaam karte haiñ"

"maḳhmūr-e-adā-e-sāqī hai mahrūm dil-e-nākām nahīñ khiñch aa.ī hai mere sāġhar meñ vo mai jo rahīn-e-jām nahīñ ai qadr-shanās-e-jins-e-girāñ bas ek nazar hai qīmat-e-dil yuuñ muft luTā.e dete haiñ kuchh sūd-o-ziyāñ se kaam nahīñ duniyā-e-chaman hai pesh-e-nazar phirtā hai samāñ āñkhoñ meñ vahī ham laakh raheñ pāband-e-qafas kuchh dil to asīr-e-dām nahīñ kyoñ daaġh lahū ke dhote ho kyoñ zīnat-e-dāman khote ho bekār pareshāñ hote ho tum par to koī ilzām nahīñ vo mahv-e-taġhāful suntā hai ham kahte haiñ dil kā afsāna kuchh bāteñ haiñ bahkī bahkī sī āġhāz nahīñ anjām nahīñ hai kis kā jigar ye dard sahe hai tīr-e-nazar kī taab kise maḳhsūs hai mere dil ke liye ye lutf-e-ḳhalish kuchh aam nahīñ yā ham hī nahīñ shāyān-e-jafā yā us ko nahīñ hai qadr-e-vafā is bazm meñ 'kaifī' varna koī mahrūm nahīñ nākām nahīñ"

"ḳhū-e-talab kā dil se batānā kuchh aur hai ḳhuddāriyoñ kā apnī taqāzā kuchh aur hai sīmāb aur barq kī betābiyāñ bajā lekin dil-o-jigar kā machalnā kuchh aur hai maanā shafaq meñ surḳhī hai mastī sharāb meñ lekin tire shabāb kā naqsha kuchh aur hai maanā ki māh-o-anjum-o-gul haiñ bahut hasīñ lekin mirī nigāh ne dekhā kuchh aur hai ab kaif-o-imbisāt se 'kaifī' mujhe ġharaz lazzat-kash-e-alam huuñ tamannā kuchh aur hai"

"aap ko gar kuchh ḳhayāl-e-vā'da-e-bāham rahe mubtalā-e-ārzū kyoñ mubtalā-e-ġham rahe kar taḌapne meñ madad ai dil ki Thānī ham ne hai aaj qaid-e-ġham rahe yā mubtalā-e-ġham rahe phir vahī āshuftagī ho phir vahī dīvāngī dil pe yārab phir junūn-e-ishq kā 'ālam rahe is pashemānī pe qurbāñ kyā karūñ jaañ bhī nahīñ mere mar jaane pe koī mubtalā-e-ġham rahe phir vahī rang-e-parastish hai vahī tarz-e-vafā phir kisī ke āstāñ par apnī gardan ḳham rahe taab lā.ūñ diid kī 'kaifī' ye mumkin hai kahāñ nayyar-e-tābāñ ke aage qatra-e-shabnam rahe"

"fareb-ḳhurda-e-paimān-e-yār honā thā rahīn-e-kashmakash-e-intizār honā thā likhīñ azal se thiiñ mahrūmiyāñ muqaddar meñ nishāna-e-sitam-e-rozgār honā thā taġhāful aap kā sheva sahī magar kuchh to ḳhayāl-e-ḳhātir-e-ummīd-vār honā thā ġhazab huā ki sahar se hī pahle dil Duubā abhī kuchh aur shab-e-intizār honā thā"

"jabīñ miT ke ḳhud āstāñ ho ga.ī hai zamīñ ham-sar-e-āsmāñ ho ga.ī hai chaman meñ mirī dāstāñ kis ne kah dī jo yuuñ har kalī ḳhūñ-chakāñ ho ga.ī hai tire zikr-e-rangīñ se jān-e-tamannā mirī dāstāñ dāstāñ ho ga.ī hai maiñ sadqe tasavvur kī rā’nā.iyoñ ke rasā.ī mirī bhī kahāñ ho ga.ī hai vo jān-e-chaman hī nahīñ hai chaman meñ mujhe fasl-e-gul bhī ḳhizāñ ho ga.ī hai hai ik rabt-e-ḳhās us kī begāngī meñ adāvat mohabbat-nishāñ ho ga.ī hai"

"dāman-e-tār-tār ke din haiñ phir chaman meñ bahār ke din haiñ dil-e-ḳhūñ-gashta hai yahāñ jab tak lāla-e-dāġh-dār ke din haiñ chaak hotā hai dāman-e-hastī gulsitāñ meñ bahār ke din haiñ haa.e kyā chiiz hai javānī bhī be-piye hī ḳhumār ke din haiñ hāsil-e-ishq hai fareb-e-umīd din to bas intizār ke din haiñ ho rahe haiñ sitam ba-qadr-e-vafā 'kaifī'-e-dil-figār ke din haiñ"