taklif miT gai magar ehsaas rah gayaa — Abdul Hamid Adam

zindagi zor hai ravaani kaa
kyaa thamegaa bahaav paani kaa

— Abdul Hamid Adam

ijaazat ho to main tasdiq kar luun teri zulfon se
sunaa hai zindagi ik khub-surat daam hai saaqi

— Abdul Hamid Adam

savaal kar ke main khud hi bahut pashemaan huun
javaab de ke mujhe aur sharmsaar na kar

— Abdul Hamid Adam

marne vaale to khair hain bebas
jiine vaale kamaal karte hain

— Abdul Hamid Adam

mai-kada hai yahaan sukun se baiTh
koi aafat idhar nahin aati

— Abdul Hamid Adam

saaqi mujhe sharaab ki tohmat nahin pasand
mujh ko tiri nigaah kaa ilzaam chaahiye

— Abdul Hamid Adam

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

sitam to ye hai ki vo bhi na ban sakaa apnaa
qubul ham ne kiye jis ke gham khushi ki tarah

— Qateel Shifai

kaun si aisi kami mere khad-o-khaal mein hai
aaina khush nahin hotaa kabhi mil kar mujh se

— Afzal Gauhar Rao

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

— Zafar Iqbal

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

— Abu Mohammad Sahar