Shayari Of Abdul Hamid Adam

"gunāh-e-jur.at-e-tadbīr kar rahā huuñ maiñ ye kis qimāsh kī taqsīr kar rahā huuñ maiñ maiñ jāntā huuñ alāmat hai zo.af himmat kī jise nasīb se ta.abīr kar rahā huuñ maiñ abhī tadabbur-o-tadbīr kā nahīñ mauqa.a abhī himāyat-e-taqdīr kar rahā huuñ maiñ hujūm-e-hashr meñ kholūñgā adl kā daftar abhī to faisle tahrīr kar rahā huuñ maiñ javāb dene kī aadat nahīñ ḳhudā ko agar to kyā parastish-e-tasvīr kar rahā huuñ maiñ tabāh ho ke haqā.eq ke khurdure-pan se tasavvurāt kī ta.amīr kar rahā huuñ maiñ ḳhudā ke aage 'adam' zikr-e-azmat-e-insāñ ġhalat maqām pe taqrīr kar rahā huuñ maiñ"

"ġham-e-mohabbat satā rahā hai ġham-e-zamāna masal rahā hai magar mire din guzar rahe haiñ magar mirā vaqt Tal rahā hai vo abr aayā vo rañg barse vo kaif jaagā vo jaam khanke chaman meñ ye kaun aa gayā hai tamām mausam badal rahā hai mirī javānī ke garm lamhoñ pe Daal de gesuoñ kā saaya ye dopahar kuchh to mo.atadil ho tamām māhaul jal rahā hai ye bhīnī bhīnī sī mast ḳhushbū ye halkī halkī sī dil-nashīñ bū yahīñ kahīñ terī zulf ke paas koī parvāna jal rahā hai na dekh o mah-jabīñ mirī samt itnī mastī-bharī nazar se mujhe ye mahsūs ho rahā hai sharāb kā daur chal rahā hai 'adam' ḳharābāt kī sahar hai ki bārgāh-e-rumūz-e-hastī idhar bhī sūraj nikal rahā hai udhar bhī sūraj nikal rahā hai"

"mujh se chunāñ-chunīñ na karo maiñ nashe maiñ huuñ maiñ jo kahūñ nahīñ na karo maiñ nashe meñ huuñ insāñ nashe meñ ho to vo chhuptā nahīñ kabhī har-chand tum yaqīñ na karo maiñ nashe meñ huuñ ye vaqt hai farāḳh-dilī ke sulūk kā tañg apnī āstīñ na karo maiñ nashe meñ huuñ be-iḳhtiyār chuum na luuñ maiñ kahīñ inheñ āñkhoñ ko ḳhashmagīñ na karo maiñ nashe meñ huuñ har-chand mere haq meñ hai ye rahmat-e-ḳhudā āñchal mire qarīñ na karo maiñ nashe meñ huuñ nashshe meñ surḳh rañg tahī-az-ḳhatar nahī.? hoñToñ ko ahmarīñ na karo maiñ nashe meñ huuñ dekho maiñ kah rahā huuñ tumheñ pai-ba-pai 'adam' mujh ko bahut hazīñ na karo maiñ nashe meñ huuñ"

"go tirī zulfoñ kā zindānī huuñ maiñ bhuul mat jaanā ki sailānī huuñ maiñ zindagī kī qaid koī qaid hai sūkhte tālāb kā paanī huuñ maiñ chāñdnī rātoñ meñ yāroñ ke baġhair chāñdnī rātoñ kī vīrānī huuñ maiñ jis qadar maujūd huuñ mafqūd huuñ jis qadar ġhā.eb huuñ lāfānī huuñ maiñ mujh ko tanhā.ī meñ sunñā baiTh kar mutrib-e-lamhāt-e-vajdānī huuñ maiñ jis qadar kartā huuñ andesha 'adam' us qadar tasvīr-e-hairānī huuñ maiñ aql se kyā kaam mujh nāchīz kā ek ma.amūlī sī nādānī huuñ maiñ huuñ agar to huuñ bhī kyā is ke sivā qīmtī virse kī arzānī huuñ maiñ dil kī dhaḌkan baḌhtī jaatī hai 'adam' kis hasīñ ke zer-e-nigrānī huuñ maiñ"

"ḳhush huuñ ki zindagī ne koī kaam kar diyā mujh ko supurd-e-gardish-e-ayyām kar diyā saaqī siyāh-ḳhāna-e-hastī meñ dekhnā raushan charāġh kis ne sar-e-shām kar diyā pahle mire ḳhulūs ko dete rahe fareb āḳhir mire ḳhulūs ko badnām kar diyā kitnī duā.eñ duuñ tirī zulf-e-darāz ko kitnā vasī.a silsila-e-dām kar diyā vo chashm-e-mast kitnī ḳhabar-dār thī 'adam' ḳhud hosh meñ rahī hameñ badnām kar diyā"

"dil Duub na jaa.eñ pyāsoñ ke taklīf zarā farmā denā ai dost kisī mai-ḳhāne se kuchh ziist kā paanī lā denā tūfān-e-havādis se pyāre kyuuñ itnā pareshāñ hotā hai āsār agar achchhe na hue ik sāġhar-e-mai chhalkā denā zulmāt ke jhurmuT vaise to bijlī kī chamak se Darte haiñ par baat agar kuchh baḌh jaa.e tāroñ se subū Takrā denā ham hashr meñ aate to un kī tash.hīr kā baa.is ho jaate tash.hīr se bachne vāloñ ko ye baat zarā samjhā denā maiñ pairahan-e-hastī meñ bahut uryāñ sā dikhā.ī detā huuñ ai maut mirī uryānī ko malbūs-e-'adam' pahnā denā"

"ye kaisī sargoshī-e-azal sāz-e-dil ke parde hilā rahī hai mirī samā.at khanak rahī hai ki terī āvāz aa rahī hai havādis-e-roz-gār merī ḳhushī se kyā intiqām leñge ki zindagī vo hasīn zid hai ki be-sabab muskurā rahī hai tirā tabassum faroġh-e-hastī tirī nazar e'tibār-e-mastī bahār iqrār kar rahī hai sharāb īmān lā rahī hai fasāna-ḳhvāñ dekhnā shab-e-zindagī kā anjām to nahīñ hai ki sham.a ke saath rafta rafta mujhe bhī kuchh niiñd aa rahī hai agar koī ḳhaas chiiz hotī to ḳhair dāman bhigo bhī lete sharāb se to bahut purāne mazāq kī baas aa rahī hai ḳhirad ke TuuTe hue sitāre 'adam' kahāñ tak charāġh bante junūñ kī raushan ravish hai āḳhir diloñ ko raste dikhā rahī hai"

"vo abrū yaad aate haiñ vo mizhgāñ yaad aate haiñ na pūchho kaise kaise tīr-o-paikāñ yaad aate haiñ vo jin ke taht jhuk jaatā thā sar asnām ke aage vahī bhūle hue ahkām-e-yazdāñ yaad aate haiñ jo aksar bār-var hone se pahle TuuT jaate the vahī ḳhasta shikasta ahd-o-paimāñ yaad aate haiñ vo marmar kī tarah shaffāf aur hañste hue a.azā hayāt-e-jāvidāñ ke sāz-o-sāmāñ yaad aate haiñ gumāñ hotā hai vahshī nik.hatoñ ne bheñch Daalā hai kuchh itne be-mahābā sumbulistāñ yaad aate haiñ vo gul-andāz jin kā ḳhalq sarmāya thā jiine kā vo ban ban kar charāġh-e-mahfil-e-jāñ yaad aate haiñ ḳhayāl aatā hai jab bhī dilbaroñ kī ham-nashīnī kā talātum rang ke ḳhushbū ke tūfāñ yaad aate haiñ uḌī phirtī thī bosoñ kī chaTak jin kī fazāoñ meñ vo ehsāsāt meñ Duube shabistāñ yaad aate haiñ faqīh-o-shaiḳh ke zehnoñ meñ but hoñge ḳhudāoñ ke maiñ insāñ huuñ mujhe to sirf insāñ yaad aate haiñ piyāla shaam ko rakhtā huuñ jab bhī maiñ 'adam' aage javāñ ham-joliyoñ ke rū-e-ḳhandāñ yaad aate haiñ"

"faqīr kis darja shādmāñ the huzūr ko kuchh to yaad hogā huzūr kis darja mehrbāñ the huzūr ko kuchh to yaad hogā vo mai-kada thā sanam-kada thā ki bāb-e-jannat khule hue the tamām shab aap ham kahāñ the huzūr ko kuchh to yaad hogā vahāñ bahāroñ ke zamzame the vahāñ nigāroñ ke jamgaThe the vahāñ sitāroñ ke kārvāñ the huzūr ko kuchh to yaad hogā pahan ke phūloñ ke taaj sar par hasīn-o-shādāb masnadoñ par subū-ba-kaf kaun hukmarāñ the huzūr ko kuchh to yaad hogā marāhil-e-rāhat-o-amāñ the masā.il-e-māh-o-kahkashāñ the mashāġhil-e-harf-o-dāstāñ the huzūr ko kuchh to yaad hogā agarche shauq-o-talab the be-sāḳhta ham-āġhoshiyoñ pe maa.il ka.ī takalluf bhī darmiyāñ the huzūr ko kuchh to yaad hogā latīf shāmeñ tabī.atoñ ke zamīr se ḳhuub āshnā thiiñ hasīñ savere mizāj-dāñ the huzūr ko kuchh to yaad hogā nazar kī had tak muhīt thā silsila mahakte hue guloñ kā guloñ meñ pariyoñ ke ghar nihāñ the huzūr ko kuchh to yaad hogā ajiib sāñche kī kashtiyāñ bah rahī thiiñ lahroñ ke zer-o-bam par ajiib sūrat ke bādbāñ the huzūr ko kuchh to yaad hogā ulūhiyat aap is hasīñ ittifāq par muskurā rahī thī sanam ḳhudāoñ ke mehmāñ the huzūr ko kuchh to yaad hogā jo vāqiye the vo gūñjte zamzamoñ ke mānind maujzan the jo ḳhvāb the sarv-e-bostāñ the huzūr ko kuchh to yaad hogā kahīñ kahīñ salsabīl o kausar kī jot maujūd thī zamīñ par kahīñ kahīñ arsh-o-āsmāñ the huzūr ko kuchh to yaad hogā shab-e-mohabbat huzūr kī kākuloñ ke khulne ke silsile meñ 'adam' ke isrār kyā javāñ the huzūr ko kuchh to yaad hogā"

"har parī-vash ko ḳhudā taslīm kar letā huuñ maiñ kitnā saudā.ī huuñ kyā taslīm kar letā huuñ maiñ mai chhuTī par gaahe gaahe ab bhī bahar-ehtirām da.avat-e-āb-o-havā taslīm kar letā huuñ maiñ be-vafā maiñ ne mohabbat se kahā thā aap ko lījiye ab bā-vafā taslīm kar letā huuñ maiñ jo añdherā terī zulfoñ kī tarah shādāb ho us añdhere ko ziyā taslīm kar letā huuñ maiñ jurm to koī nahīñ sarzad huā mujh se huzūr bāvajūd us ke sazā taslīm kar letā huuñ maiñ jab baġhair us ke na hotī ho ḳhalāsī ai 'adam' rahzanoñ ko rahnumā taslīm kar letā huuñ maiñ"

"shab kī bedāriyāñ nahīñ achchhī itnī mai-ḳhvāriyāñ nahīñ achchhī vo kahīñ kibriyā na ban jaa.eñ nāz-bardāriyāñ nahīñ achchhī haDDiyāñ gālne ke gur sīkhūñ sahl-añgāriyāñ nahīñ achchhī kuchh ravādāriyoñ kī mashq bhī kar sirf adākāriyāñ nahīñ achchhī haath se kho na baiThnā us ko itnī ḳhuddāriyāñ nahīñ achchhī ai ġhafūrur-rahīm sach farmā kyā ḳhatā-kāriyāñ nahīñ achchhī"

"bhūlī-bisrī bātoñ se kyā tashkīl-e-rūdād kareñ ham ko to kuchh yaad nahīñ hai aap hī kuchh irshād kareñ pahle-pahal jab aap kā joban itnā shahr-āshob na thā ik mushtāq se sāda-dil insāñ kī parastish yaad kareñ aap se mumkin hai dil-jūī yazdāñ kī ye riit nahīñ jis ko sun kar chup rahnā hai us se kyā fariyād kareñ ishq ne sauñpā hai kaam apnā ab to nibhānā hī hogā maiñ bhī kuchh koshish kartā huuñ aap bhī kuchh imdād kareñ juzv-e-tabī.at ban jaa.eñ to jaur karam ho jaate haiñ lutf na ab raa.ij farmā.eñ sirf sitam ījād kareñ"