mohabbaton ke hasin baab se zaraa aage — Abdul Wahab Sukhan

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

— Abdul Wahab Sukhan

jal rahe hain abhi kamzor aqidon ke charaagh
jis kaa ji chaahe zamaane mein khudaa ho jaae

— Abdul Wahab Sukhan

thaam rakkhi hai ham ne chaal apni
aaj-kal hain sitaare gardish mein

— Abdul Wahab Sukhan

phans hi jaate hain kisi daam mein aakhir ham log
laakh kahte hain chhalaave mein nahin aaeinge

— Abdul Wahab Sukhan

vo aise moD par mujh ko milaa thaa
main tanhaai kaa aadi ho chukaa thaa

— Abdul Wahab Sukhan

ye pyaar kaa jazba tire kuchh kaam to aae
meraa nahin bantaa hai to ban aur kisi kaa

— Abdul Wahab Sukhan

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani