ye irtiqaa-e-bashar ki hai kaun si manzil — Afsar Mahpuri

ham kahaan honge na jaane is tamaashaa-gaah mein
kis tamaashaai se pahle kis tamaashaai ke baad

— Afsar Mahpuri

na jaane is qadar kyuun aap divaane se Darte hain
charaagh-e-anjuman hain aur parvaane se Darte hain

— Afsar Mahpuri

kahaan thi manzil-e-maqsud apni qismat mein
kisi ki raahguzar bhi mili hai mushkil se

— Afsar Mahpuri

ham to us vaqt samajhte hain ki aati hai bahaar
dasht se jab koi jhankaar si aa jaati hai

— Afsar Mahpuri

bahaar aaegi gulshan mein to daar-o-gir bhi hogi
jahaan ahl-e-junun honge vahaan zanjir bhi hogi

— Afsar Mahpuri

daagh dil ke hain salaamat to koi baat nahin
tirgi laakh sahi subh kaa imkaan rakhnaa

— Afsar Mahpuri

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

— Anjum Siddiqui

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

safar mein aise kai marhale bhi aate hain
har ek moD pe kuchh log chhuT jaate hain

— Aabid Adeeb