naa-rasaai ne ajab taur sikhaae hain 'ataa' — Ahmad Ata

kisi ko khvaab mein aksar pukaarte hain ham
'ataa' isi liye sote mein honT hilte hain

ham aaj hanste hue kuchh alag dikhaai diye
ba-vaqt-e-girya ham aise the, saare jaise hain

phir koi duur huaa jaataa hai
phir koi dil ke qarib aaegaa

ham ne avval to kabhi us ko pukaaraa hi nahin
aur pukaaraa to pukaaraa bhi sadaaon ke baghair

ye jo raaton ko mujhe khvaab nahin aate 'ataa'
is kaa matlab hai miraa yaar khafaa hai mujh se

ham aastaan-e-khudaa-e-sukhan pe baiThe the
so kuchh saliqe se ab zindagi tabaah karein