shaam aae aur ghar ke liye dil machal uThe — Akhtar Usman

shahr khaali hai kise eid mubaarak kahiye
chal diye chhoD ke makka bhi madina vaale

— Akhtar Usman

ye kaaenaat mire saamne hai misl-e-bisaat
kahin junun mein ulaT duun na is jahaan ko main

— Akhtar Usman

vaqt ab dastaras mein hai 'akhtar'
ab to main jis jahaan tak ho aauun

— Akhtar Usman

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

chaand ne taan li hai chaadar-e-abr
ab vo kapDe badal rahi hogi

— Jaun Elia

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal