Sham

vo na aa.egā hameñ ma.alūm thā is shaam bhī
intizār us kā magar kuchh soch kar karte rahe

ye ham jo peT se hī sochte haiñ shaam o sahar
kabhī to jā.eñge is dāl-bhāt se aage

dil nā-umīd to nahīñ nākām hī to hai
lambī hai ġham kī shaam magar shaam hī to hai

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

jo ḳhushāmad kare ḳhalq us se sadā raazī hai
sach to ye hai ki ḳhushāmad se ḳhudā raazī hai

jis jā makīn banñe ke dekhe the maiñ ne ḳhvāb
us ghar meñ ek shaam kī mehmān bhī na thī

ġham-e-duniyā bhī ġham-e-yār meñ shāmil kar lo
nashsha baḌhtā hai sharābeñ jo sharāboñ meñ mileñ

muntazir us ke dilā tā-ba-kujā baiThnā
shaam huī ab chalo sub.h phir aa baiThnā

zindagī phailī huī thī shām-e-hijrāñ kī tarah
kis ko itnā hausla thā kaun jī kar dekhtā

vasl ke din shab-e-hijrāñ kī haqīqat mat pūchh
bhuul jaanī hai mujhe sub.h kuuñ phir shaam kī baat

dil kī betābī nahīñ Thaharne detī hai mujhe
din kahīñ raat kahīñ sub.h kahīñ shaam kahīñ

vasl kī raat ke sivā koī shaam
saath le kar sahar nahīñ aatī

maiñ Dūbtā jazīra thā maujoñ kī maar par
chāroñ taraf havā kā samundar siyāh thā

haañ dikhā de ai tasavvur phir vo sub.h o shaam tū
dauḌ pīchhe kī taraf ai gardish-e-ayyām tū

garmī-e-hasrat-e-nākām se jal jaate haiñ
ham charāġhoñ kī tarah shaam se jal jaate haiñ

shaam se kuchh bujhā sā rahtā huuñ
dil huā hai charāġh muflis kā

vaqt hai ab namāz-e-maġhrib kā
chāñd ruḳh lab shafaq hai gesū shaam

shām-e-firāq ab na pūchh aa.ī aur aa ke Tal ga.ī
dil thā ki phir bahal gayā jaañ thī ki phir sambhal ga.ī

dil-girafta hī sahī bazm sajā lī jaa.e
yād-e-jānāñ se koī shaam na ḳhālī jaa.e

dil kī be-tābī Thaharne nahīñ detī mujh ko
din kahīñ raat kahīñ sub.h kahīñ shaam kahīñ