ye kaaenaat mire saamne hai misl-e-bisaat — Akhtar Usman

shahr khaali hai kise eid mubaarak kahiye
chal diye chhoD ke makka bhi madina vaale

vaqt ab dastaras mein hai 'akhtar'
ab to main jis jahaan tak ho aauun

shaam aae aur ghar ke liye dil machal uThe
shaam aae aur dil ke liye koi ghar na ho

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

dariyaa ne bhi bhaag-bhari ki gaagar itni bhar di hai
ab gaagar ke honT bhigote jaate hain pagDanDi ko

muddaton baa'd pashemaan huaa dariyaa ham se
muddaton baa'd hamein pyaas chhupaani aai

pyaas dariyaa ki nigaahon se chhupaa rakkhi hai
ek baadal se baDi aas lagaa rakkhi hai

meri fitrat hi mein shaamil hai mohabbat karnaa
aur fitrat kabhi tabdil nahin ho sakti

taarikh-e-kaaenaat-e-ibaadat junun se hai
unvaan-e-aql-o-hosh hai divaangi ki baat