ek usi ko dekh na paae varna shahr ki saDkon par — Ameeq Hanafi

vo jab mujh ko dekh rahi thi main ne us ko dekh liyaa thaa
bas itni si baat thi lekin baDhte baDhte kitni baDhi hai

— Ameeq Hanafi

dil mein dukh aankhon mein nami aasmaan par ghaTaaein
andar baahar is or us or har or baadal

— Ameeq Hanafi

phuul khile hain likhaa huaa hai toDo mat
aur machal kar ji kahtaa hai chhoDo mat

— Ameeq Hanafi

donon kaa milnaa mushkil hai donon hain majbur bahut
us ke paanv mein mehndi lagi hai mere paanv mein chhaale hain

— Ameeq Hanafi

ishq ke hijje bhi jo na jaanein vo hain ishq ke daavedaar
jaise ghazlein raT kar gaate hain bachche schōl mein

— Ameeq Hanafi

cigarette jise sulagtaa huaa koi chhoD de
us kaa dhuaan huun aur pareshaan dhuaan huun main

— Ameeq Hanafi

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif