husn jalva dikhaa gayaa apnaa — Saifuddin Saif

'saif' andaaz-e-bayaan rang badal detaa hai
varna duniyaa mein koi baat nai baat nahin

shor din ko nahin sone detaa
shab ko sannaaTaa jagaa detaa hai

zindagi kis tarah kaTegi 'saif'
raat kaTti nazar nahin aati

hamein khabar hai vo mehmaan ek raat kaa hai
hamaare paas bhi saamaan ek raat kaa hai

ye aalaam-e-hasti ye daur-e-zamaana
to kyaa ab tumhein bhuul jaanaa paDegaa

kitne anjaan hain kyaa saadgi se puchhte hain
kahiye kyaa meri kisi baat pe ronaa aayaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

bataa khud ko bhalaa kaise sanvaarun
mujhe gham aainon mein dikh rahaa hai

us pe qurbaan ki jis ne tiri aavaaz suni
sadqe us aankh ke jis ne tiraa jalva dekhaa

vo dard huun koi chaara nahin hai jis kaa kahin
vo zakhm huun ki hai dushvaar indimaal miraa

dard mein lazzat bahut ashkon mein raanaai bahut
ai gham-e-hasti hamein duniyaa pasand aai bahut