ishq farmaa liyaa to sochtaa huun — Anjum Saleemi

patthar mein kaun jonk lagaaegaa mere dost
dil hai to mubtalaa bhi kahin honaa chaahiye

— Anjum Saleemi

kisi tarah se nazar mutmain nahin hoti
har ek shai ko dobaara badal ke dekhtaa huun

— Anjum Saleemi

Thiik se yaad bhi nahin ab to
ishq ne mujh mein kab qayaam kiyaa

— Anjum Saleemi

barham hain mujh pe is liye donon taraf ke log
divaar uTh gai thi to dar kyuun banaayaa hai

— Anjum Saleemi

main sab kaa sab mohabbat ke liye huun
so laa-mahdud muddat ke liye huun

— Anjum Saleemi

kaisi hoti hain udaasi ki jaDein
aa dikhaaun tujhe dil ke reshe

— Anjum Saleemi

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

— Asim Wasti