kamar baandhi hai tauba toDne par — Anwar Dehlvi

pheinkiye kyuun mai-e-naaqis saaqi
shaikh-saahib ki ziyaafat hi sahi

— Anwar Dehlvi

na main samjhaa na aap aae kahin se
pasina pochhiye apni jabin se

— Anwar Dehlvi

kuchh khabar hoti to main apni khabar kyuun rakhtaa
ye bhi ik be-khabari thi ki khabar-daar rahaa

— Anwar Dehlvi

sharm bhi ik tarah ki chori hai
vo badan ko churaae baiThe hain

— Anwar Dehlvi

miTTi kharaab hai tire kuche mein varna ham
ab tak to jis zamin pe rahe aasmaan rahe

— Anwar Dehlvi

surat chhupaaiye kisi surat-parast se
ham dil mein naqsh aap ki tasvir kar chuke

— Anwar Dehlvi

dil mein na ho jurat to mohabbat nahin milti
khairaat mein itni baDi daulat nahin milti

— Nida Fazli

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

— Ahmad Faraz

bahut himmat kaa hai ye kaam 'shaariq'
ki sharmaate nahin Darte hue ham

— Shariq Kaifi

khamoshi bas khamoshi thi ijaazat ab hui hai
ishaaron ko tire paDhne ki jurat ab hui hai

— Shariq Kaifi

chalne kaa hausla nahin ruknaa muhaal kar diyaa
ishq ke is safar ne to mujh ko niDhaal kar diyaa

— Parveen Shakir

vo bahut chaalaak hai lekin agar himmat karein
pahlaa pahlaa jhuuT hai us ko yaqin aa jaaegaa

— Zafar Iqbal