tiraa ghurur jhuk ke jab milaa mire vajud se — Ashhar Hashmi

us se milne ki talab mein ji liye kuchh aur din
vo bhi khud biite dinon se bar-sar-e-paikaar thi

— Ashhar Hashmi

vahin ke pattharon se puchh meraa haal-e-zindagi
main reza reza ho ke jis dayaar mein bikhar gayaa

— Ashhar Hashmi

rahguzar bhi tiri pahle thi ajnabi
har gali ab tiri rahguzar ho gai

— Ashhar Hashmi

zindagi karnaa vo mushkil fan hai 'ashhar' haashmi
jaise ki chalnaa paDe bijli ke nange taar par

— Ashhar Hashmi

meri duniyaa mein samundar kaa kahin naam nahin
phir ghaTaa pheinkti hai mujh pe ye patthar kaise

— Ashhar Hashmi

'ashhar' kahin qarib hi taarik ghaar hai
jugnu ki raushni ko vahin chal ke chhoD dein

— Ashhar Hashmi

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

— Fani Badayuni

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

— Arshad Jamal Sarim

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

— Mir Taqi Mir

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi