aansu tumhaari aankh mein aae to uTh gae — Ataur Rahman Jameel

aane vaali aa nahin chukti jaane vaali jaa bhi chuki
vaise to har jaane vaali raat thi aane vaali raat

— Ataur Rahman Jameel

ye duniyaa hai yahaan har aabgina TuuT jaataa hai
kahin chhupte phiro aakhir zamaana DhunDh hi legaa

— Ataur Rahman Jameel

dil par barf ki sil rakh denaa naagan ban kar Das lenaa
apne liye donon hi baraabar kaali ho ki ujaali raat

— Ataur Rahman Jameel

un ko bhi 'jamil' apne muqaddar se gila hai
vo log jo sunte the ki chaalaak bahut hain

— Ataur Rahman Jameel

kuchh khvaab kuchh khayaal mein mastur ho gae
tum kyaa qarib nikle ki sab duur ho gae

— Ataur Rahman Jameel

tumhaari bazm se jab bhi uThe to haal-zada
kabhi javaab ke maare kabhi savaal-zada

— Ataur Rahman Jameel

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi