ab main huun aur khvaab-e-pareshaan hai mere saath — Barqi Azmi

samajh rahaa thaa jise khair-khvaah main apnaa
vahi hai dushman-e-jaan meraa sab se baDh kar aaj

— Barqi Azmi

ruThne aur manaane ke ehsaas mein hai ik kaif-o-surur
main ne hamesha use manaayaa vo bhi mujhe manaae to

— Barqi Azmi

is haal mein kab tak yunhi ghuT ghuT ke jiyungaa
ruThaa hai vo aise ki manaa bhi nahin saktaa

— Barqi Azmi

huaa karbalaa mein jo qurbaan 'barqi'
husain ibn-e-haidar kaa vo khaandaan thaa

— Barqi Azmi

chappa chappa us ki gali kaa rahaa hai mere zer-e-qadam
josh-e-junun se azm-e-safar tak ek kahaani biich mein hai

— Barqi Azmi

ajab khun-chakaan karbalaa kaa samaan thaa
the sab tishna-lab aur dariyaa ravaan thaa

— Barqi Azmi

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

— Zafar Iqbal

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

— Imdad Imam Asar

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

— Abu Mohammad Sahar

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa

— Asim Nadeem Asi

ye san kar meri nindein uD gai hain
koi meraa bhi sapnaa dekhtaa hai

— Mahtab Alam