sarfaroshi ki tamannaa ab hamaare dil mein hai — Bismil Azimabadi

na apne zabt ko rusvaa karo sataa ke mujhe
khudaa ke vaaste dekho na muskuraa ke mujhe

— Bismil Azimabadi

ek din vo din the rone pe hansaa karte the ham
ek ye din hain ki ab hansne pe ronaa aae hai

— Bismil Azimabadi

ik ghalat sajde se kyaa hotaa hai vaaiz kuchh na puchh
umr bhar ki sab riyaazat khaak mein mil jaae hai

— Bismil Azimabadi

ye zindagi bhi koi zindagi hui 'bismil'
na ro sake na kabhi hans sake Thikaane se

— Bismil Azimabadi

aazaadi ne baazu bhi salaamat nahin rakkhe
ai taaqat-e-parvaaz tujhe laaein kahaan se

— Bismil Azimabadi

kyaa karein jaam-o-subu haath pakaD lete hain
ji to kahtaa hai ki uTh jaaiye mai-khaane se

— Bismil Azimabadi

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

— Ahmad Faraz

himmat kaa zaahidon ki saraasar qusur thaa
mai-khaana khaanqaah se aisaa na duur thaa

— Asad Ali Khan Qalaq

ye hausla bhi kisi roz kar ke dekhungi
agar main zakhm huun us kaa to bhar ke dekhungi

— Aziz Bano Darab Wafa

saraa-e-ishq mein baiThe hue hain dil vaale
aur ek aakhiri tohmat ke intizaar mein hain

— Aziz Nabeel

dil-e-sarshaar miraa chashm-e-siyah-mast tiri
jazba Takraa de na paimaane se paimaane ko

— Hadi Machlishahri

mushkil kaa saamnaa ho to himmat na haariye
himmat hai shart saahib-e-himmat se kyaa na ho

— Imdad Imam Asar