Courage

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

ahl-e-himmat ko balaaon pe hansi aati hai
nang-e-hasti hai musibat mein pareshaan honaa

shaaeri talab apni shaaeri ataa us ki
hausle se kam maangaa zarf se sivaa paayaa

buraa mat maan itnaa hausla achchhaa nahin lagtaa
ye uThte baiThte zikr-e-vafaa achchhaa nahin lagtaa

ai jazba-e-dil gar main chaahun har chiiz muqaabil aa jaae
manzil ke liye do gaam chalun aur saamne manzil aa jaae

zindagi ko hausla dene ke khaatir
khvaahishon ko reza reza chun rahaa huun

khaak uchhaalo jo zamin par to falak par gir jaae
ab khulaa ye ki bahut past hai himmat meri

ghurur-e-husn na kar jazba-e-zulekhaa dekh
kiyaa hai ishq ne yusuf ghulaam aashiq kaa

chaahiye khud pe yaqin-e-kaamil
hausla kis kaa baDhaataa hai koi

kyaa asar thaa jazba-e-khaamosh mein
khud vo khich kar aa gae aaghosh mein

haae logon ki karam-farmaaiyaan
tohmatein badnaamiyaan rusvaaiyaan

bahut himmat kaa hai ye kaam 'shaariq'
ki sharmaate nahin Darte hue ham

chalne kaa hausla nahin ruknaa muhaal kar diyaa
ishq ke is safar ne to mujh ko niDhaal kar diyaa

maqaam-e-shauq tire qudsiyon ke bas kaa nahin
unhin kaa kaam hai ye jin ke hausle hain ziyaad

ik fursat-e-gunaah mili vo bhi chaar din
dekhe hain ham ne hausle parvardigaar ke

hausla kis mein hai yusuf ki kharidaari kaa
ab to mahngaai ke charche hain zulekhaaon mein

qadam-qadam pe tire rokne ki koshish ne
qadam-qadam pe miraa hausla baDhaayaa hai

kuchh kaTi himmat-e-savaal mein umr
kuchh umid-e-javaab mein guzri

talab duniyaa ko kar ke zan-muridi ho nahin sakti
khayaal-e-aabru-e-himmat-e-mardaana aataa hai

ai zindagi tu mire hausle ki daad to de
main uTh ke roz nayaa din gale lagaataa huun