ab ke mili shikast miri or se mujhe — Charagh Sharma

'mir' ji ishq maanaa ki neamat nahin par main is ko balaa bhi nahin maantaa
maantaa huun khudaa-e-sukhan bhi tumhein aur hukm-e-khudaa bhi nahin maantaa

— Charagh Sharma

main ne qubul kar liyaa chup chaap vo gulaab
jo shaakh de rahi thi tiri or se mujhe

— Charagh Sharma

khataaein is liye kartaa huun main ki jaantaa huun
sazaa mujhe hi milegi khataa karun na karun

— Charagh Sharma

haath bhar duuri pe hai qismat ki chaabi aap ki
ek chhoTaa saa qadam aur kaamyaabi aap ki

— Charagh Sharma

koi khat-vat nahin phaaDaa koi tohfa nahin toDaa
ki vo dekhe to khud soche ki dil toDaa nahin toDaa

— Charagh Sharma

charaagh raushan zarur kar to par is se pahle khudaa ki khaatir
yahaan pe phailaa hai jo andheraa sameT zer-e-charaagh rakh de

— Charagh Sharma