zarre zarre mein mahak pyaar ki Daali jaae — Danish Aligarhi

rudaad-e-shab-e-gham yuun Dartaa huun sunaane se
mahfil mein kahin un ki surat na utar jaae

— Danish Aligarhi

muskuraa kar un kaa milnaa aur bichhaDnaa ruuTh kar
bas yahi do lafz ik din daastaan ho jaaeinge

— Danish Aligarhi

gar tarannum par hi 'daanish' munhasir hai shaairi
phir to duniyaa bhar ke shaair naghma-khvaan ho jaaeinge

— Danish Aligarhi

aakhiri vaqt talak saath andheron ne diyaa
raas aate nahin duniyaa ke ujaale mujh ko

— Danish Aligarhi

tere firaaq ne ki zindagi ataa mujh ko
teraa visaal jo miltaa to mar gayaa hotaa

— Danish Aligarhi

ho ke majbur ye bachchon ko sabaq denaa hai
ab qalam chhoD ke talvaar uThaa li jaae

— Danish Aligarhi

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

kisi se ishq apnaa kyaa chhupaaein
mohabbat Tapki paDti hai nazar se

— Meer Mehdi Majrooh

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey